The Pawn (Closed)

以前每個禮拜都會黎灣仔上堂，成日遠遠經過「和昌大押」都無為意入面係咩野，剩係知道佢係一座好舊嘅建築。直至過左好耐好耐，聽朋友講先知原來入面係一間唔錯嘅餐廳，於是我為左滿足自己嘅好奇心，襯住屋企人生日去訂檯試下。今次我地好好彩，被安排到戶外露台嘅座位，可以享受埋灣仔嘅夜景🌃。露台出面有火爐，唔洗驚凍親，不過如果怕凍嘅話最好都係著得厚啲。前菜方面，我地點左麵包同湯。麵包係酸種麵包，暖暖地，外脆內軟，非常好食是日餐湯係蕃茄湯，上菜嘅時候係上左鋪上材料嘅碟先，然後再倒湯入去。個人認為個湯有啲淡，湯同材料好似無乜連繫嘅感覺，溫度亦唔太熱，有啲失準。主菜方面，我地點左三個main兩個sides，分別係鱈魚、牛柳、羊膝、烤南瓜同埋椰菜沙律。我嘅羊膝肉嫩多汁夠入味，下面嘅豆軟硬適中，唔「騷」，總括係唔錯嘅。其他嘅Mains味道都唔錯，美中不足嘅係個溫度唔夠熱。甜品方面，我地點左芝士蛋糕伴雪糕同埋橙味麵包布丁。Cheesecake係homemade嘅，芝士唔算太濃，但係唔會太甜，食落去好舒服。麵包布丁居然有驚喜。個人本身唔係麵包布十嘅fans，但係佢新鮮焗起熱辣辣，好軟熟。橙味香，但係唔會太濃，甜度適中