魔膳工房 (Changed Hand) New Restaurant

我諗真係喺工廈搵食搵上癮，星期日晚又係唔煮飯日，想開飯睇一睇有決定咗今晚食乜啦，於是即刻打去book枱，兩位搞掂曬。一開頭行錯路🤔原來喺鱷魚恤條電梯落返去開源道右手邊第一棟大廈已經係啦。真係好彩有訂位，上到去發覺佢原來都好多人去食，如果walk-in真係可能無位。由於佢有set dinner ，我地就唔駛散叫啦，於是我哋就叫咗兩個餐我就食法式鵝肝香橙意大利飯（$198），老公就叫烤法式春雞配薯菜（$168），個餐仲跟湯同麵包，老公飲熱檸蜜就加$3，我就飲荔枝玫瑰梳打加＄5。但我地就無加錢食沙律吧。餐包熱辣辣，我地一個紅湯一白湯。法式鵝肝香橙意大利飯黎到時候，老公即變心心眼，因為塊鵝肝好大塊而且好厚身，意大利飯微微橙色，淡淡橙香既意大利飯好配鵝肝，減低左鵝肝油膩感！我個set dinner 仲有個小吃，係蔬菜汁煮藍青口，一客有三隻，老公話好喜歡佢個汁😋春雞是即烤的，所以要等耐少少。佢既色澤幾好，感覺唔會好乾😃，都算做到外脆內軟，肉質juicy ，薯菜有薯仔、露筍同番茄仔，份量ok。為食推介：香橙意大利飯比較少見，值得一試。