Sedap Malaysian Delights (Closed)

今日過海同朋友食飯，係中環揀左呢間馬來西亞菜，講真自己都唔知馬來西亞菜式係有咩出名同有咩口味，今次以個人口味去評價一下啦。首先比大家睇一睇午市既餐單～基本上都係包野飲既套餐，係中環黎講價錢算中等左右。我地兩位都叫左拉茶，奶味比較重，入口都好滑亦唔會好甜，如果茶味濃少少會好岩我口味。我地兩個都叫左黃金飯，佢係配炸雞脾，我係咖哩雞，基本上有好多飯，好大份，巴東牛肉好淋都好入味，蝦好大隻但始終係套餐，有種預先整好既感覺，冇咩蝦味但都冇雪味。 炸雞脾唔係好大隻，但配合咁多飯都可以，咖哩雞食落有少少出水，似係分開煮完再燴返一齊。 配菜勉強合格，反而黃金飯有啲水準，粒粒乾身同有飯香，而且食落唔會好油。我地仲加左兩個小食，胡椒雞翼，雞翼有啲乾亦唔太入味，跟餐都要50蚊，唔太推薦。米紙脆春卷，如果冇個脆字佢都係呢到比較有驚喜既作品，作為套餐小食，我估計係預先整好既原因所以唔太脆身，但佢既餡料配合得幾好，中間有紫蘇葉味道非常突出。總結價錢上黎講的確唔吸引我呢啲鄉下仔。 中午套餐比我印象都有少少粗製濫造，本人不太推薦。