餃掂手工餃子雲吞專門店

今日約左人係銅鑼灣飲野，事前諗住係附近求其食少少野打式，揀左間餃子店估唔到有驚喜！呢間「餃掂」見佢咁有特別用黑白松茸黎整餃子，即時吸引到我！黑白松茸雙拼煎餃，一次過試晒兩款，即叫即煎都唔洗等好耐，煎得好香口一啲都無燶，咬落勁脆卜卜聽到有聲，入面好多肉汁，食落去流晒出黎，松茸亦落得好多一啲都唔孤寒，好濃味好出色！椰菜豬肉湯餃，呢湯底係用左狀元九鼎湯，飲落好重豆香好好飲，唔係味精湯，食完餃子忍唔住飲埋啲湯。至於餃子都唔輸蝕，湯餃吸晒啲湯汁變到大大粒，入面椰菜絲令肉餃好爽口，不錯。小食方面亦有特式，黃金皮蛋唔係好多地方食到，好甘香。日本流心蛋配上黑白松茸同樣好夾，可以食到松茸本身既味道。食完飲返杯蜂蜜檸檬薏米水同山楂雪梨水，清甜又健康。