望月軒

Open Now

Now Closed

今日住咗喺澳門好耐嘅四舅公過咗嚟香港玩，我哋一家人決定同佢喺信德中心入面嘅望月軒晚飯。第一次嚟望月軒，呢度環境好寬敞好舒服，主打係食四川同埋上海菜。因為四舅公本身都係四川人所以對川菜的要求都頗高。我哋今晚人唔係太多所以都唔敢叫得太多嘢食而且第一次試都希望睇吓質素如何先，啱啱坐低我哋叫咗一啲冷盤，其中一個係飄香無骨鳳爪($88)，好味、少少辣，而且因為冇骨所以啱曬我呢啲懶人，作為餐前小食，可以一路食一路傾計，主菜方面我哋點咗飄香鮮花椒牛肉($198)，呢個有少少辣味但亦都唔會太辣，而且牛肉煮得好嫩好有牛肉味，好食到唔停得口!份量亦都好夠，唔會好似出面一啲餐廳咁只係得幾片牛肉，之後嘅係宣威蜜汁火肪($198)，食嘅時候用配埋嘅夾包將蜜汁火肪、脆卜卜嘅腐皮同埋青瓜夾住一齊食，口感好有層次！另一樣值得推介嘅係老字號樟茶鴨($338)，味道唔錯而且鴨肉好嫩滑。最後我哋叫咗四川家常炒飯($98)，炒飯顆粒分明非常好味！連出名嘴刁嘅四舅公都讚不絕口！總括嚟講呢度嘅餸菜無論喺味道同份量方面都相當值得推介而且睇佢個菜牌入面亦都有重慶雞煲同埋香辣烤魚，下次嚟一定要試埋呢幾款餸！