金子半之助 (新都會廣場) (Closed)

豐盛華麗之江戶前天丼有穴子、海老、小柱魷魚天婦羅餅、溫泉蛋、海苔和莢豌豆。一上枱就見到穴子橫放在碗上，好大條呀！因為穴子實在太大條，要食左穴子先食到個飯。所以我先食穴子。穴子即是星鰻，外脆內軟。外層嘅炸漿好薄，入面嘅鰻魚好肥美，無骨，啖啖肉。即使炸過，仍然保留到魚嘅肉汁，唔會炸到乾爭爭。食完穴子先食飯。食飯之前先將溫泉蛋戳破。睇住蛋汁緩緩流出，感覺治癒～飯本身已有甜甜地嘅醬汁，撈埋蛋汁，口感豐富，令飯更惹味，淨食飯都得呀！天婦羅炸蝦就食得多，呢個丼飯有海苔同埋小柱魷魚天婦羅餅我覺得幾特別。炸過嘅海苔香味更突出更脆口。不知師博是特意還是無意，一邊沒有蘸上炸漿，另一邊有。可能是不想讓炸漿蓋過海苔的顏色吧。如果是因為這樣，就要讚一讚師博的心思啦！魷魚天婦羅魷魚夠新鮮，口感彈牙。如果想加d辣味可以自行加d調味粉。味道類似七味粉。隨餐奉送味㬝湯同埋漬物。味㬝湯唔會好鹹，有豆腐同海苔，豆腐同海苔份量都幾多，好足料。漬物有兩款：紫薑海帶絲同埋白蘿蔔漬。紫薑海帶絲紫薑好辣，冇渣，配埋海帶絲同吃，海帶絲爽脆，更添口感。食紫薑辣得滯嘅話可以食下白蘿蔔漬中和下。白蘿蔔漬夠酸又爽脆。仔細睇原來上面有柚子果皮絲