西餐大排檔 (Closed)

大排檔，當大家一聽到呢三個字，就會好自然咁諗起街邊好有鑊氣嗰啲大排檔；但係如果將大排檔再加埋西餐，會係啲咩呢？答案就係西餐大排檔啦！友人今次帶我去呢間位於銅鑼灣登龍街嘅「西餐大排檔」，呢間大排檔好特別，因為係樓上嘅餐廳，唔係一間大排檔，而呢間大排檔亦都令我留下啲幾好嘅印象。首先，係地方乾淨闊落，完全唔係大排檔咁，又光猛，又有電視睇。之後，再睇下有咩食，呢度雖然冇大排檔嘅鑊氣小炒，不過都有幾高級嘅西餐食。友人同我分別叫咗一個套餐，我呢個無肉不歡嘅人一定叫牛肉，所以呢個美國燒牛肉眼餐一定走唔甩；而友人就試咗個燒紐西蘭羊鞍餐。主菜嚟之前先試試餐湯，個松露蘑菇湯要讚下，除咗足料之外，松露味又香又濃，令我飲完想再飲呀！我朋友就叫咗另一個牛腩羅宋湯，佢就話有少少辣，不過整體都可以接受。到主菜美國牛肉眼排啦，我就叫咗七成熟，牛排好大塊，而且燒到啱啱好，唔會過熟，再加埋啲燒汁一齊食，好正呀！至於個燒紐西蘭羊鞍，冇羶味，好稔，仲配埋兩種唔同嘅醬汁，芥末醬同果醬，食落幾清新。嚵食嘅我梗係食埋個是日甜品！大家不妨試試呢間特別嘅大排檔啦！