Poking

平日經常過嚟上環呢邊搵食 ，貪佢呢度多唔同種類嘅小店， 每次過嚟總會有新嘅驚喜。今日經過 poking，見佢出面楝咗個易拉架， 主打營養沙律， 配搭各種魚肉豆類，糙米藜麥飯，望落幾新奇健康。 係好奇心驅使下，就走咗入去一試。店舖以白色同埋淺木色為主調， 環境清幽。 可惜座位都比較窄，比較適合獨自或者情侶朋友兩人過嚟食。Salmon the Classic裏面有唔少嘅三文魚切粒，配以牛油果，青瓜，青蔥，同檸檬。 粗略估計有成十三四粒三文魚切粒， 每粒入口都豐腴嫩滑， 味道濃沃，唔會話淋pat pat 好多筋。飯底可以揀淨壽司飯，淨糙米飯 ，或者沙律菜配一種飯。 我揀咗沙律菜壽司飯。 碗飯送到上嚟檯面嗰時嚇咗一跳，啲餸堆到滿一滿，好似一座綠色嘅小山丘咁， 上面仲撒咗啲芝麻碎， 淋上醬油麻油同埋醋， 食落高蛋白質之餘又完全唔會覺得有負擔。 三文魚同埋牛油果所帶嚟嘅油脂感滿足咗我食肉嘅需要， 沙律菜同埋醋呢個配搭啱啱好中和咗油脂感， 食落非常之飽肚， 好滿足。賣單承惠108蚊， 係個好好嘅體驗。