尚夢・茳煳 (Closed)

一家人黎到灣仔嘅尚夢 •茳煳食晚飯，依間餐廳主打新派精品中菜，亦有一系列經典懷舊菜式同功夫菜。餐廳都展示左好多有趣嘅裝飾，可以一邊食飯一邊欣賞。餐前兩款燉湯雪梨同螺頭湯都非常足料。宮廷香烤骨肥瘦均勻，煮到夠淋好入味，醬汁帶點微辣，加埋個菜一齊都好好食。上枱時店員仲會幫手將香烤骨分件，方便進食。香煎龍躉球平時龍躉就食開蒸，估唔到煎又幾香，火喉控制得唔錯，煎得金黃，啖啖魚肉，魚皮又彈牙。脆皮牛臉肉外皮炸得超香脆，入面嘅牛臉肉超嫩滑，可以話係我食過最滑嘅牛肉，入口即化，非常驚喜。終極小炒皇韮菜同蝦乾魷魚等配料炒埋一齊，炒到好香好有鑊氣。一啖接一啖，送飯食一絕。茳煳炒飯 炒飯有咸蛋杞子等配料，炒到金黃色，食落咸蛋黃味都好出好香，就咁食都唔會好單調，味道豐富。桂花咸魚蓉炒米粉米粉炒到乾身，咸魚味唔算突出，帶點點咸味，就咁食都唔會太濃味，同埋其他餸一齊食就剛好啦。最後嘅桂花糕亦散發淡淡嘅清香。無論係玫瑰花茶定每盅湯，都見到有個燭台保溫，就知道餐廳都好重視食物嘅質素。想試下有質素而又價錢合理嘅中菜，就可以黎試下啦。