星海薈 (利舞臺廣場)

Open Now

Now Closed

呢間餐廳真係食極都唔厭，永遠都有新菜式吸引住我，今次試吓銅鑼灣分店。招牌白胡椒蟹上次食過真係返尋味，呢一碟招牌菜式梗係要再嗌啦！同上次一樣，色香味俱全，胡椒味好重，肉蟹夠鮮甜。冰鎮花雕五頭南非鮑魚一上枱視覺效果已經夠晒冰凍，有乾冰襯托，鮑魚有成5頭，切成厚片，仲附上芥末同醬油。食落除咗鮮甜彈牙有嚼頭，更特別係鮑魚有浸過花雕油。令味道更獨特，值得一試！黑蒜螺頭燉雞湯餐廳推薦食完蟹煲可以跟手飲呢個湯，本身聽個名都怕啲蒜頭味會好奇怪，點知嚟到一聞，黑蒜同雞味兩者都超級香濃！飲落去先係鹹鹹地，其後有種鮮甜美滲出來，原來裏面仲有豬肉同螺肉吊味，仲一啲都唔油膩，好有驚喜！鮮菠蘿脆皮咕嚕肉打頭陣見到個擺盤已經心花怒放，同一般嘅唔同，新鮮菠蘿切花放一邊，客人可以自行調節點配搭，食落超級甜又無渣！值得一讚係啲肉每舊都有脆皮包住，絕對唔係炸粉嗰種口感，內裏爽彈好似豬頸肉咁嘅口感，不起仲每舊都有拔絲效果，酸甜度適中，好味！環境一樣舒服，樓底好高。