天天海南雞飯 (Fashion Walk)

Open Now

Now Closed

作為海南雞控，今次響銅鑼灣見到「天天海南雞飯」，點都要入去朝聖下。餐牌除咗有必食嘅海南雞外，仲有其他小菜，海鮮及甜品等等。我哋點咗正宗海南雞，雞油飯，班蘭汁椰香鱈魚，蟹籽蟹肉西蘭花，同豆腐花。正宗海南雞（$199） - 雞好嫩滑，連薑蓉，辣椒醬，同埋甜醬油上。海南雞配埋油飯同醬料一齊食，好夾好好味，不愧為米芝蓮級別。雞油飯- 細（$39）- 雖然叫做「細」，但分量應該至少都有成三大碗，兩至三個人食絕對足夠。油飯帶微微嘅油香，唔會油淋淋，粒粒分明，我俾好高分。班蘭汁椰香鱈魚（$99）- 鱈魚炸得好香好脆，點埋班蘭椰汁，估唔到椰汁味同鱈魚咁夾，味道好好。蟹籽蟹肉西蘭花（$109）- 賣相一流，蟹肉蟹籽嘅份量都好多，配埋西蘭花同埋芡汁，清清地得來又幾好味。 新加坡原味豆腐花（$22）- 入口好香好滑，有入口即溶嘅感覺，味道唔會太甜，值得一試。餐廳環境舒適，仲設有戶外座位，感覺都幾chill下。