坂奈 (Closed)

聽朋友介紹銅鑼灣開咗間燒魚專門店，所以決定去試吓。餐廳鄰近銅鑼灣地鐵站， 位置非常方便。裝修好有日本居酒屋感覺，座位大約十幾個。餐牌上有好多選擇，淨係魚都已經好多種類，因為選擇實在太多所以決定叫師父推介。柚子X梅洒甜甜地，好易入口。柚子X檸檬酒酸酸地，好清新。螢光魷魚冲漬有好香嘅魷魚味，醬油味濃，做下酒菜一流。食緊螢光魷魚嘅時候聞到烤魚嘅香味，開放式廚房可以望到成個烤魚嘅過程。前菜已經非常豐富，沙律菜翠綠新鮮，刺身亦非常鮮甜。燒BB喜之次，係生長於深海嘅幼魚，非常珍貴嘅一種魚，外皮乾脆，肉質嫩滑，雖然細細條但好多肉。吞拿魚額頂柳半熟燒，即係魚嘅額頭，每條吞拿魚只有兩小塊亦都係非常珍貴，表面用火炙過，表面有焦香，咬落油脂充滿口腔，入口即溶。香港專門吃日式燒魚店舖並不是隨處可見，而且所有魚直接由日本訂購，絕對值得一試。