素食一家 (Closed)

今晚嘅飯局有一位素食朋友，於是上網搵吓有咩啱食，見到呢間分數幾高，幾多人讚，膽粗粗試吓啦！本身約咗8:30 ，但係我同其中一位朋友8:10就到左，因為佢喺馬路邊，冇得行下商場嘆下冷氣等時間過，我就嘗試入去同侍應講book咗8:30 ，睇下可唔可以早少少入去啦，點知個職員真係好好，等左唔使5分鐘就清左張枱比我，仲要係舒適型六人卡位（我哋四位）。呢間野要讚一讚，佢冇限時，所以其餘兩個朋友未到我哋都可以坐住傾吓計等埋一齊先叫餸。8:30朋友到齊，我哋叫咗幾多人讚嘅北海道芥末龍蝦球，椒鹽猴頭菇配西檸汁，藥膳餃子煲，荷葉陳村粉。叫咗都唔使5分鐘啲菜都上到7788 ，先試過猴頭菇，佢將猴頭菇切片炸香再灑d椒鹽喺面頭，就咁食我已經覺得好夠味，再點埋啲西檸汁，酸酸地甜甜地又幾夾，而且用猴頭菇切片炸香，有種啖啖肉嘅感覺，口感同雞髀菇好唔同，個人覺得猴頭菇好食啲。藥膳餃子煲，先飲下一啖湯，奶白色，清甜，但係冇乜藥材味，點知一咬個餃子原來啲藥材味喺晒裏面，呢種感覺都幾得意。再來荷葉陳村粉，上大陸好鍾意叫呢一個餸，所以一聽到陳村粉就叫咗過嚟食，佢有少少似腸粉，但係又薄少少，上邊有啲菇同豉油，加上佢用荷葉鋪喺蒸