Coffee Break (TKO Gateway東翼)

Open Now

Now Closed

精選餐湯(追加$28)首先上菜嘅是日餐湯係南瓜忌廉湯，南瓜味道香濃，湯底口感幼滑，飲落微甜唔膩。-烤腸拼盤 配薯蓉酸菜($128)前菜點左香腸拼盤，入面有四款不同口味嘅烤腸，分別有香草雞肉腸、豬肉腸等，份量好多，咬落juice唔乾身。烤腸下面係一層薄薄嘅薯蓉，食落有少少黑松露香味，再混合埋酸菜粒，係醒胃嘅前菜。-菠菜煙三文魚忌廉意粉($78)煙三文魚片份量好多，食落口感彈牙唔咸，菠菜意粉同忌廉汁混合得剛剛好，唔會太少醬冇味，又唔會太多醬汁咁heavy。-法式香草烤雞 配薯條,沙律(全隻$138)烤雞有半隻同全隻選擇，味道偏濃，香草醬汁配係香烤嘅雞件，可謂色香味俱全。薯條係粗身嘅，外脆內軟，而沙律菜係以醋調味，正好清新嘅味道中和翻烤雞嘅香濃。-芒果紅茶(套餐加$18)芒果果香嘅茶底，加入左蘋果粒、其亞籽，味道清甜之餘有咬口，係健康嘅水果茶。-朱古力沙冰(套餐加$22)沙冰可以選擇一款配料，揀左Tiramisu，朱古力沙冰味道香濃，而上面添加嘅Tiramisu混合埋飲落似芝士奶蓋，香甜可口。