Food Combo (Closed)

今日去開屯門新墟買野，之後見有啲肚餓就入咗food combo 食晚餐。在場所見佢啲set擺得好靚，每一個set都有一個木盤載着。等左幾張枱之後終於就到我哋坐低啦，侍應好好禮貌，笑容好親切，算係香港地來講難得見到嘅。我就揀咗西班牙炒飯嗰個餐，同行友人就揀咗葡國雞飯。每個餐附帶一個沙律、小食、餐湯、主菜同水果杯。飲品方面，佢有三款飲品係任飲嘅，兩款係凍，一款係二。我就揀咗熱嘅飲品，鮮姜紅棗桂圓杞子水，飲落都幾足料，又唔會好甜。嘢食嚟到喇，個賣相好吸引，我個款沙律係薯仔沙律，都好開胃。小食就係有雞翼，主菜個西班牙炒飯，比起我平日食傳統嘅正宗西班牙炒飯係改良咗一啲嘅，味道無咁咸，相對比較容易入口，同埋健康一啲。至於朋友個飯佢都話好食，我亦都試咗佢嗰款小食，係蝦餅嚟嘅。食完晒之後其實都已經好飽，再食埋個水果杯，好清新，畫上一個完美嘅句號。