胡爐 (Closed)

呢排天氣轉涼咗好多，拿拿聲約朋友去打邊爐，今次去咗銅鑼灣一間樓上火鍋店，餐廳環境舒適，枱與枱之間有屏風隔住，私隱度頗高。今次叫左花膠雞湯鍋底，秋冬滋補就啱曬，雞湯湯頭雞味濃郁，平時食雞鍋湯底通常啲雞肉會好鞋，但呢到嘅雞肉幾嫩滑，值得一讚，急不及待就飲咗一碗湯先開始打邊爐。另外仲點咗幾個拼盤，包括有葫蘆牛拼盤、餃子拼盤、手打丸拼盤同蔬菜拼盤。葫蘆牛拼盤有牛舌芯、安格斯手切肥牛、極上首切牛頸脊、牛胸爽同霜降牛粒。拼盤一上枱已望到牛肉肉質好靚、好新鮮，脂肪比例平均，入口牛味豐富，肉質軟腍。餃子拼盤有黑松露蟹肉餃、自家製韭菜餃、手工蝦餃同XO 鮑魚蝦餃王，手工餃子皮薄餡靚，薄到可以好清晰見到餡料，餃子皮口感帶少少煙韌，真係幾不錯。手工蝦餃餡料超多蝦肉，口感爽彈，松露蟹肉餃黑松露味濃郁，再加上蟹肉，配搭幾特別。手打丸拼盤有手打香茜炸菜牛丸、蟹籽蝦丸、手打墨魚丸同黑松露墨魚丸。手打丸爽滑彈牙，香茜炸菜牛丸就似食緊山竹牛肉球咁。蔬菜拼盤有幾款唔同嘅蔬菜，要黎清清油膩感就啱曬。最後仲叫咗個黄金炸魚皮，魚皮即叫即炸，上枱時熱辣辣，入口非常酥脆，鹹蛋黃味濃郁，咬落脆卜卜，怕熱氣可以浸一浸湯底先食。