花貝日本料理 (Closed)

銅鑼灣開平道嘅CUBUS樓上有好多靚餐廳，多數都係好高質。 今日同朋友嚟到六樓嘅花貝日本料理食午餐，一出𨋢就見到大大棵聖誕樹，同埋好靚嘅日式箱房。右邊就係卡位同壽司吧枱，加上陽光由玻璃窗透入，格外顯得高雅舒適。同朋友選擇坐吧枱，可以睇住師傅整嘢食，係開心嘅！想食最時令嘅食材，我揀咗omakase餐， Momiji $488一位。  前菜（三點盛）三款冷盤前菜：黑豆配芝麻豆腐、番茄牛油果、鮟鱇魚肝擺放別緻，由淡味開始食到濃味，味道唔錯。 握り壽司（五貫）間八係頂級壽司食材，一般要食omakase先有機會食到，非常鮮味。文甲係魷魚嘅一種，肉質爽脆又帶點膠質伊佐木加咗啲薑同蔥提味，魚肉彈牙吞拿魚背鮮紅色，油脂少，我都係鍾意腩位多啲甜蝦肉質細綿嫩滑卷物冬瓜乾卷用紫菜包住，味道無乜特別。燒物鴨胸，好肥美，皮同肉之間有一層厚厚脂肪，食嗰時有好多油份咇出嚟，油香泗溢。揚物 大蝦、南瓜同椒仔，炸得幾乾身，大蝦固然好食，南瓜更出色。主食揀咗魚麵，爽滑彈牙，麵身幼方便掛湯，好好食！甜品有黑糖同豆腐雪糕，兩款都叫咗，味道清清地又唔會太甜。美好一天由美食開始~~