Curry Corner (Closed)

同朋友去西九龍中心覓食，行哂成個food court後就決定要食個印度咖哩。小店由印度人打理，有唔少港人幫襯。喺半開放式廚房入面，見到師父喺入面轉薄餅同煎薄餅，人手即叫即整。菜式選擇唔多，原本想叫murtabak set, 有幾塊有餡薄餅之餘仲有雞肉/羊肉揀，但佢冇貨。唯有揀其他，見人地叫商務套餐好似好吸引，所以就叫咗個羊肉curry set ($48)，佢有咖哩羊肉、印度白飯、一塊paratha 薄餅、少少沙律菜同有個清湯。雖然滿足到小妹想食印度咖哩同想食羊嘅胃口，但整體而言白飯偏硬同唔熱，而薄餅都因為凍咗所以覺得唔太好食，不過佢都幾軟身同有油香。咖哩方面，因為小妹一向重口味所以覺得佢個咖哩汁幾好味，不過香料味濃未必人人都啱。羊肉林身但冇乜羊肉味。最後食完飲埋個蘿蔔清湯可以清清重口味，湯入面有蘿蔔粒同薑絲，薑味濃郁。以$48食到印度羊肉咖喱嚟講算係唔錯。