鬼滷 (Closed)

今日同家人揀咗近銅鑼灣港鐵站C1出口嘅鬼滷食晚飯，用QR code自己落單。事先無睇食評，所以叫咗潮洲方魚bb西蘭花，原本以為係新鮮魚加西蘭花，原來係類似一小塊一小塊的方形魚乾，味道特別，加上長條形的西蘭花，第一次吃長身嘅西蘭花，建議由有花嗰邊吃起會較入味。另外叫咗蜆仔肉生菜包，生菜雖然較細塊，但味道鮮甜，配合蜆仔食啱啱好，唔會覺得好油膩。最後叫咗滷水五餸拼盤，有鵝肉、豬肚、豬仔脾、墨魚同慢煮鹽香雞，鵝肉同雞都去咗骨，而且好入味，真好！豬仔脾好嫩滑，一啲都唔韌，我最愛食墨魚，口感好滑，如果可以要兩份，我會叫兩份墨魚取代豬肚，因為實在太好味，雖然份量較小，但我喜歡！最可惜係我無為意有鬼滷涼茶，好奇上網睇返啲人會食乜飲乜先知有，當時我只叫咗罐普通汽水，可惜！可惜！