韓兄弟燒烤

Open Now

Now Closed

Item: Hanbros Korean Bulgogi
Rating: 3
Author: 奧志雷

Hanbros Korean Bulgogi

248 Reviews

Taste

Decor

Service

Hygiene

Value

16671

Hung Hom

$101-200

Korean Roast Meat

176

奧志雷

Level4

2.1K

Read full review

驚見收銀機旁有隻可愛狗隻在休眼，像真度極高的招財狗呢，個肚仲識脹下縮、脹下縮下，似足正在呼吸，堅係可愛既。間中會在午市時段幫襯，真心對午飯時段特價餐提不起興趣，都有試過兩三次不同出品，質素味道都強差人意，都係放棄吧﹗

見晚市餐牌顯示烤肉豬牛款色不是太多亦沒太花巧，基本韓烤。餐牌寫 10 人分限量供應？朋友估係 10 人份量，但售價只係 $88 蚊那有可能呢。攪盡腦汁，限量供應只賣 10 份麻？估死人咩。捍衞廣東話、捍衞繁體字，點解寫方便麵及米飯啊？大陸風格及語調，赤化香港非常不舒服。朋友仔問是否韓國是那樣稱呼呢？我從來未聽過。

早飲早醉早訓覺，堅係早到六點半就開飯飲酒食晚飯。整晚只有幾檯食客幫襯，而且還有韓國少女、韓國少奶，連韓國阿豬媽都出動埋呢﹗似乎很受韓國民歡迎。

侍應姐姐嬸嬸們都好熱情好健談，還耐心解釋前菜絕對不是任添任食架，都要視乎銷費多少。完全明白的，只係我一路以來的誤解啫。最具特色，別樹一格當然係韓式海鮮刺身﹗真係非常少機會食得到，當然係我目標啦。韓國 hite 生啤，清爽味道，酒味不苦不濃，淺嚐熱下身，邊飲邊吃最佳良伴﹗等中段先讓真露出場吧。

魚板腍腍的少少甜搭少少咸，蘿蔔微弱的酸味有點硬帶一點爽，青瓜咸辣的醃味腍腍的不太喜歡。有 5 星蕃薯的驚喜，粉粉黏黏極盡甜美但不膩喎。每位有兩款，三人行有六款喎，平時午飯時段食來食去只有大豆芽及泡菜乍。蒜蓉菠菜，葉腍劈劈濕濕的，莖少少爽感，好似食緊韮杞喎。為何三個只得四碟小食呢？兩個都係四碟，點計的？

大豆芽，乾乾不爽甜多汁，水份不足，被冷氣抽乾？留條芽根係度是故意的嗎？嚥嚥韌韌，味道咸而不辣。泡菜咸味濃濃，辣味都被蓋過了﹗非常爽脆，淨食太過嗆，有白飯或生菜就更好。泡菜，勁酸不爽甜多汁，瘦削貧脊。大豆芽，爽甜肥美蠻可愛。

鐵板炒牛肉飯，個賣相完全不討好，我本人真的見到已唔想食，廿十成熟深啡色的肉碎，乾爭爭鞋烚烚，醃味十分甜，就算送飯都覺得十分單調乏味。好采餐前小食有泡菜、菠菜、大豆芽，撈埋牛肉碎自製拌飯好食多倍。初時睇完餐牌後，腦海不停浮現韓燒靚牛扒厚切多汁爆漿，出現眼前的竟只是牛肉碎。心情撕裂，如夢初醒﹗撈飯撈麵當然用肉碎。

韓式辣醬撈水冷麵，真係辣架喎 ﹗硬係有種甜甜酸酸的味道，是否果醋呢？水冷麵會加雪梨醋呢，味道勁似啫喱，食落都開胃醒神。不過辣椒醬杰撻撻要花點時間才可以跟麵球撈得均勻，本身個蕎麥麵係完全無味的。想試烤牛或烤豬生菜包，而且生菜包再送送多碗飯。不過又想試牛骨湯或蔘雞湯，胃食的人特別煩惱﹗最終都決定食麵，太興奮睇錯似為係湯水冷麵，原來係辣拌冷麵啊﹗照燒汁牛肉石鍋飯，甜甜的牛肉碎嚥韌有趙口，未算乾鞋。醃味濃厚撈上熱辣辣飯粒及照燒醬，香香甜甜有肉味還可以。

水拌生魚片面，韓國比目魚刺身拌麵？有特別菜式梗係要試試。等了又等，等一等，苦候 30 分鐘送到。因為魚片未解凍？;還是即劏即片呢？靚仔的外觀，骨子大方得體非常吸引。魚片、生菜絲、蟹子、酸蘿蔔片、青瓜絲、紫菜，韓國五行養生顏色都有齊，設置得宜，精彩奪目﹗

先來兩口凍湯，淡淡清新酸甜味道，提神開胃喚醒我的食慾﹗倒落韓國甜辣醬再跟所有材料撈得均勻，起動﹗棉棉白色的麵條本身沒什麼味道，幸好吸汁力強，盡情地散發出溫和酸辣味，最後還留著酸甜餘韻在舌齒之間。比目魚肉充滿彈力，魚味濃濃，感覺不錯。淨食無味麵條真的悶死寡死﹗必定要捲著不同配料入口，有趣添味許多了﹗

部隊鍋，為何還再跟多碗白飯既？湯底下有半個麵，還要跟碗飯？摸不著邊際。我一心想食麵，份量得半個完全唔夠喉。辣湯底比辛辣麵湯底更加辣，似強辣版的大家樂羅宋湯，食到我出晒水滴晒汗。白洋蔥及紫洋蔥最多，啖啖都係洋蔥，幸好夠熟爽脆帶甜。撈撈有什麼寶藏，年糕片、魚糕片、豬肉碎、午餐肉、焗豆、芝士腸，沒怎麼樣特別出色的食材，全無感覺是但清晒算數。唔想浪費碗白飯，盡人事食半碗吧﹗濕爛的飯用金屬碗盛著，倒到鍋內當湯飯食，不喜歡麻麻地。

原味炸雞，風魔一時的炸雞啤酒，我都來潮食一下，不過換成燒酒唔係啤酒 ﹗原味等於無味？炸漿黏著雞皮脆卜卜，炸得內外到超級乾涸，胸肉直頭鞋烚烚。咬兩啖我真係想掉低放棄，除香口脆身乾爽外，無一可取。雞醬似十足泰式雞醬甜甜黐立立，淨食雞件無味道，滾上雞醬甜到死﹗兩邊都死路一條，不過點醬濕濕地較易入口。

吞合魚蛋卷，跟餐牌張相原全不同既？微暖送到。極老蛋皮捲著一小篤吞拿魚碎，根本就係罐頭油鹽水浸到鞋烚烚起渣品種，份量細到幾乎食唔到有魚。蛋暖魚碎室溫，到底我食緊乜？如果換成吞拿魚刺身就生動晒啦﹗淡口茄汁蛋黃醬調味，兒童餐味道，不懂欣賞。

人蔘雞湯，湯渣雞肉，霉腍乾鞋無味道。糯米綿綿，湯汁清淡，不太有人蔘味道，飲落都舒服暖胃唔難食既。曾嘆過最美味的蔘雞湯，係韓國明洞香港人開的餐廳。

韓式解酒湯，韓國菜乾湯？係某某餐廳飲過係牛仔骨辣湯，兩個不同風格。大量菜乾還撈到少量極腍劈劈的牛肚絲，濃郁輕辣的湯汁散發陣陣牛內臟味道。韓式菜乾湯，等濃菜乾味，菜甜有趣。初時還以為用豬紅煲湯，咬一啖原來係巨大牛紅，而且有三四磚座陣。首次相遇，您好嗎？沒怎樣的味道，淡茂茂不腥不嗅，只有微弱湯底味道，乾乾而廷身，趙落會散開。

涼拌海螺，睇名我完全幻想成四川菜的涼拌青瓜、豬耳、豬肚、土豆絲，真身出現時才如夢初醒 ﹗我正在處身於韓國餐廳的呢。不知道配有冷拉麵，份量以乎會好飽肚，感覺似韓式辣醬拌麵。將所有辣汁、配料及拉麵撈得徹底均勻才慢慢享受。健康地加入大量蔬菜，洋蔥、青瓜、甘筍增加甜味及爽脆口感，甜辣醬溫柔的辣味附在腍腍麵條都不錯。海螺韌韌的，微弱的螺味，薄弱的鮮味，整體表演未如理想。

蒸豬肉菜餃子，泡菜餃子已取消？耐心等候廿分鐘頸都長。真係估您唔到，廣東菜肉餃子只會聯想到大白菜併豬肉，眼前竟雞係韮菜啊﹗幸好近年已經食得到無再反胃，而且越食越鍾意添。熱烘烘嚥韌餃皮，堅係皮薄餡靚，絕大部份都係爽甜韮菜，菜汁豐收美味，有幾點肉碎作點綴裝飾。跟來的醬汁甜甜的不喜歡，我唯有沾醬油蟹豉油食，更合適更好味。

活墨魚刺身，上次已經係 2011 年係韓國食，無見多年您好嗎？您冷靜少少，唔洗咁激動手舞足動，不停翻騰，輾轉反側。估唔到韓式刺身都有三款醬，還以為一早上定配烤肉添﹗蔥蒜麵豉醬、蒜味辣椒醬、淡豉油。麻油味道異常地淡，不香不甜，只油且濁﹗最夾都係蒜味辣叔醬，堅實的墨魚鬆，嚥韌微彈，吸盤啜著您的舌尖，狠狠地嘴嚼，滲出鮮味，刺激過癮又好味﹗

刺身併盤，主要挑戰海菠蘿、海腸及海參刺身，鮑魚經常食就太普通喇！海菠蘿刺身，腍腍滑潺潺充滿水份的橙肉，咸咸海水味道，底層白肉就非常爽彈清甜。食不到多，感覺似食生蠔不是人人都接受得到，食太多有點想反胃。海腸刺身，劏得乾乾淨淨，切成絲狀方便進食，脆卜卜帶點嚥韌，沙蟲的味道。海參刺身，脆得出奇，直頭聽到卜卜聲呢﹗非常淡味，有少少苦澀餘韻。鮑魚刺身，薄切嫩滑彈牙，鮮味出眾。

正宗醬油蟹，果真一分錢一分貨，價值 $300 蚊的當然突別大隻巨形 ﹗肥美啖啖鮮嫩濕潤晶瑩透亮蟹肉，閃令令反晒光 ﹗兇湧澎湃的蟹膏，鮮艷奪目的黃黃橙橙，香甜黏黏有如甘露一樣。先撈好雞蛋紫菜蟹子芝麻飯，再唧落鮮甜蟹肉，刮掉蟹膏鋪上，淋上適量海鮮豉油，溫柔細心地拌攪，讓她們慢慢完全融合，已經一切準備就緒，我黎喇！醬油蟹非常得，沒有挑剔的理由﹗最衰白飯濕爛，如果乾爽飽滿嚥韌的話，可以吸收更多精華。蟹肉蟹膏海鮮豉油融合，再跟紫菜蛋黃蟹子合體，黏滑咸甜鮮共冶一爐，宇宙級飯之盜賊，眼前大大碗碗都唔夠喉呀﹗真係唔夠飯食，幸好個牛肉大醬湯有跟碗白飯，我當然唔客氣，全部沒收﹗

韓國老闆兼大廚餐廳質素有保證。醬油蟹顏值高味道鮮肉嫩爆膏，依碗飯仔完全唔夠送蟹，要多一碗就差不多。到底白飯係咪任裝架？分數直迫佐敦醬缸呢！醬缸有醬油醃尖椒、洋蔥、蒜頭做伴菜，更多味道更多花款更加精彩啊！不過韓兄弟既環境贏九條街，地方寬敞闊落，空氣流通清新。只係男廁有點令我滴汗，還不在店舖內，要走出街外去啊。

牛肉大醬湯，味道極似蘿蔔牛腩煲啊 ﹗大醬湯完全滲透蘿蔔，甜美爆汁，不澀沒半點渣。牛腩軟綿到極，熱騰騰連湯帶飯還有滑滑豆腐掃入口，整個人生龍活虎暖笠笠。

牛併盤 A 餐，牛頸肉、牛五花、牛肉眼似乎不太夠我食，不過美女們不太嗜肉，最後都係益晒我。爐邊烘蛋，不夠嫩滑多汁，而且加泡菜粒咸咸辣辣會加好食。爐邊烘芝士粟米，粟米粒極脆極甜，半溶芝士咸香加甜粟，擦出火花。

牛五花生菜包，半爽半嫩，油脂橫飛，甘香無比，肉汁滴滴。牛頸肉生菜包，牛味特別濃，質地有嚼勁，牛甜味不容置疑，不雖要添加醬汁，夾點泡菜及大豆芽更能提鮮提味。牛肉眼生菜包，鬆軟的肉眼，油花恰到好處夠平均，充滿牛脂牛汁，用爽脆生菜包著塞入口，滋味無窮﹗生菜都已被我全部消滅﹗還有大量牛頸肉、牛肉眼、牛五花剩下，既然仲有少少飯，沾點烤肉醬全部釀入口中，無得頂呀﹗

韓國燒酒真露原味，邊食邊飲邊談，暢所欲言飲得特別快啊 ﹗從未試開飲咁多支真露，不要停支接支﹗差少少完全斷片要行 AI 導航，好彩返到屋企先暈啫﹗

韓兄弟燒烤 Open Now Now Closed

韓兄弟燒烤

Open Now

Now Closed