海鮮站

Open Now

Now Closed

首先畀個概括呢間舖頭: 鮮味、無味精、用料新鮮、中西合璧。經常經過呢間鋪頭, 都覺得佢係一間食海鮮(龍蝦之類)嘅西餐廳。認真了解過之後, 先知道佢哋係一間中西合璧嘅港式餐廳。用新鮮嘅食材, 無添加味精, 烹調出美味嘅菜式。第一次試就嚟食個午餐, 因為路經見到價錢都幾街坊價, 而選擇都幾吸引。一坐低就會放低一個茶壺、幾隻水杯, 客人可以自斟自飲。我哋嗌咗<海鮮濃湯湯飯>及<茄汁焗豬扒飯>。<海鮮濃湯湯飯>材料都好充足: 有炸魚塊、蝦、魷魚、花甲、菜。魚湯鮮美奶白, 再配上薑絲及蔥粒, 呢種中式嘅煮法非常好味, 入口暖胃。<茄汁焗豬扒飯> 有新鮮嘅番茄做汁, 再加上都幾大量嘅芝士, 又香又清新。豬扒煎香再焗, 皮脆又保存到肉汁。喺呢間餐廳食嘢嘅感覺好悠閒, 平和舒適。飯後慢條斯理飲返一、兩杯茶。老闆好好人送咗兩包糖, 畀我個女食, 氹佢開心。