魚蝦蟹 (Closed)

中環一直係拉麵界既激戰場，要係呢度生存真係要有返咁上下實力，見呢間魚蝦蟹新開無耐，梗係要試下佢乜料子。裝修走cafe shop簡樸路線，簡潔舒適，望下個餐牌就知佢走一個cross over風格，除左有濃蝦湯麵，又有酸菜魚米線，仲有港式元素，個老闆真係貪心。不過我份人好專一，入嚟就係食拉麵，叫左個王牌特大海蝦鮮蝦濃湯拉麵，盛惠188大元，無加一。碗麵一來到都幾震撼，事關隻蝦真係好巨大，心諗一定係雪蝦，點知搣開蝦殼咬佢一啖就知自錯左，隻蝦蝦肉彈牙，蝦膏勁多，單單隻蝦都知碗麵成本好高。食完巨蝦再飲啖蝦湯，顯得個湯有啲單簿，但飲得出係無味精，麵質都幾彈牙，不過唔夠掛湯。不過碗麵仲有兩塊魚肉，厚厚既魚肉嫩滑足味，又係不惜成本既地方，而且個餐有小菜又有生果切粒，足見老闆心思，值得一讚。