鰻工房 (Closed)

好耐冇食過鰻魚，好掛住日本食嗰碗鰻魚飯。星期六特登帶老公嚟呢間尖沙咀小店嘆個鰻魚午餐，記得好幾年前喺銅鑼灣店食過一次好正，但係而家銅鑼灣嗰間已經冇咗了。沙羅鰻蛇丼 $198呢個係期間限定Maga size鰻魚丼，鰻魚超級大條，有成個前手臂咁長，勁誇張。鰻魚勁肥美肉厚，蒲燒得好香，有少少燶焦香。食一啖鰻魚，然後一大啖鰻魚汁伴飯，真係勁滿足。條沙羅曼蛇底下，仲有一大塊厚燒肉子，玉子甜甜地，濕潤柔軟，用嚟餸飯又係勁正。三重鰻魚丼 $208有齊生燒鰻魚、蒲燒鰻魚同埋穴子，生燒鰻魚燒到皮脆卜卜，肉質爽脆，蒲燒鰻魚肥美甘香，穴子即係鰻魚BB肉質細嫩細嫩，啲飯可以自己加好多鰻魚汁，再紫菜絲蛋絲伴飯好好味。我哋仲加咗$18轉套餐，有溫泉蛋、鹹菜、鰻魚肝白貝湯同埋玄米茶。值得一提，鰻魚肝白貝湯好鮮甜，好驚喜。店員教我哋可以保留三份一嘅飯向店員索取昆布高湯，然後加入紫菜、芝麻成為茶漬飯，變成另外一種食法。食到最後有啲膩用呢種食法好適合，可以清清味蕾減油膩感。