碼頭故事 (Moved) New Location

一直都好想試吓食碼頭故事，今日終於有機會食到啦。呢度嘅裝修好特別，古色古香咁，好有氣氛。我地揀咗鴛鴦鍋，一邊係店員推介嘅招牌麻辣湯底，另一邊就係菌湯鍋。麻辣湯底真係好香，入面有好多辣椒仔同胡椒，嗰陣辣味好刺激，同普通得個辣字嘅火鍋湯底好唔同，而且越滾越辣，去到最後有一層好厚嘅鮮紅色辣油係面，個人認為呢個湯底真係岩哂中意食辣嘅人。菌湯底就清淡啲，有冬菇同金針菇，可以中和返味道比較濃嘅麻辣湯。嘢食方面我地嗌咗一米肥牛，上枱之後就發現佢真係有一米長，一共有10片肥美嘅牛肉，牛肉味好香，又夠肥，配埋麻辣湯底，好好食。羊肉卷嘅份量都好多，大概有十幾片，賣相好靚，食落好香羊肉味，因為好新鮮，所以就算擺落菌湯底到都唔會有好大陣羶味。獅頭肥鵝腸勁新鮮，每條都帶有少少肥膏，所以食落好有口感，點埋蔥花麻油，真係好正。三秒海帶芽有一大碟，跟指示滾三秒就食得，爽口得黎感覺好健康。值得一提嘅係佢嘅茶係玄米茶，米香好濃，同肥肉好夾，超級解膩。希望下次多啲人黎可以試到多啲菜式啦。