魚眾不同酸菜魚 (紫荊樓)

Open Now

Now Closed

放lunch去食晏，發覺好多舖頭都無開，行到去一間叫魚眾不同嘅酸菜魚店，見佢有飯有米線揀都幾啱食，就食佢啦。睇睇餐牌，全日價錢都係一樣嘅，有個一人套餐，可以揀一款餸、湯底、配菜同主食，配撘都幾自由喎。同事個份先到，佢揀左鱸魚+麻辣濃湯+金針菇+豆腐皮+白飯。一上枱已經聞到好強烈的麻辣味，試啖湯先，好濃好杰身，又香又麻正喎。鱸魚片都唔少，仲有大量腐皮同金針，幾豐富。自己份都好快到了，揀左鯛魚+老壇酸菜湯+大荳芽+萵荀+米線。湯底酸酸辣辣好惹味，無麻辣湯杰身，但味道都好濃郁嘅。鯛魚片同樣不少，口感比鱸魚爽，個人覺得鱸魚肉質偏淋，不過各有各人口味嘅。湯內仲有不少大荳芽、萵荀同酸菜，好飽足。仲有個米線好爽口，唔鍾意食個啲淋晒嘅米線，呢間啱口感。小店不用加一，食飽飽又要開工啦。