財記美食 (Closed)

下午茶時段黎到，比起上次旺左喎，卡位坐滿得返中間圓枱，好彩有人走，即刻霸張卡位先。睇下餐牌，想食份公司治就叫佢啦，再整杯凍飲降下溫。坐低後店員問飲唔飲湯，送左碗例湯，是日係紅青蘿蔔豬骨湯，好甜好好飲～餐茶要左凍檸水，多檸又夠凍，正。財記公司三文治配炸薯條，賣相幾靚，上枱時熱辣辣㗎。薯條係幼條，老麥個隻款，但新炸起就梗係好食過老麥好多啦，上面個灑左五香粉，鹹鹹地又香口。主角公司治好好食，三層包都有烘底，中間夾左好多料，第一層鹹牛肉蛋，跟住係午餐肉，煎得好香口，再黎係火腿同芝士片，下層係蕃茄同生菜，醬汁係千島醬，口感豐富味道有層次，係近期食過最好味嘅公司治。