Video
Read full review
2013-06-18
51 views
「深井燒鵝」可能好多人都識，但「深井咖喱寶」你又聽過未？原來「深井咖喱寶」（Indian Hot Pot Curry Restaurant）晌深井已紮根10多年，2009年卒之衝出深井，仲一衝衝到過對面海，落戶西環，分店名字源用番「深井咖喱寶」，但英文名字則叫The Clay Oven，想人家知道佢哋有個真正從印度入口嘅印度黏土高溫烤爐，賣嘅喺正宗印度菜。此外，佢哋仲有一家位處上環今年剛開業嘅姊妹店「印度皇」（Basmati）。今晚，就同老婆先嚟到西環嘅深井咖喱寶試菜，品嚐正宗印度菜滋味。等多幾年先有地鐵到嘅西環，感覺頗隔涉，不過對小弟而言，其實又挺方便。中環收工，坐城巴5X特快，經4號幹線唔使15分鐘就到咗西環。回程返美孚，又有隧巴904行西隊，直達屋苑樓下，超方便呀！入夜嘅西環吉席街頗靜，好多街鋪都收檔休息，但就晌電車站旁嘅深井咖喱寶燈火通明，大大個鮮黃色招牌一眼就認得出。室內裝修幾骨子，牆上有唔少印度色彩嘅掛畫，天花又有啲挺別緻嘅吊燈，整體感覺雅致有情調.；廚房對出又有一個小酒吧角，放滿唔同牌子嘅酒，嚟飲吓酒都幾唔錯喎；此外，店子入面都幾深長，如果想靜局啲，大可揀內籠嘅4人枱。全
等多幾年先有地鐵到嘅西環，感覺頗隔涉，不過對小弟而言，其實又挺方便。中環收工，坐城巴5X特快，經4號幹線唔使15分鐘就到咗西環。回程返美孚，又有隧巴904行西隊，直達屋苑樓下，超方便呀！
入夜嘅西環吉席街頗靜，好多街鋪都收檔休息，但就晌電車站旁嘅深井咖喱寶燈火通明，大大個鮮黃色招牌一眼就認得出。室內裝修幾骨子，牆上有唔少印度色彩嘅掛畫，天花又有啲挺別緻嘅吊燈，整體感覺雅致有情調.；廚房對出又有一個小酒吧角，放滿唔同牌子嘅酒，嚟飲吓酒都幾唔錯喎；此外，店子入面都幾深長，如果想靜局啲，大可揀內籠嘅4人枱。全店包括男店長、一位女侍應、兩位廚師都喺印度人，真喺唔打得都睇得。而且，如果你英文唔靈光都唔怕，因為店長Prem Bhai先生跟女侍應嘅廣東話都講得吓，基本上一定溝通到。況且，餐牌中英對照，又圖文並茂，手指篤篤都唔會點唔到菜。
翻開餐牌都有幾多選擇，分門別類，計有頭盤、沙律、湯品、印度燒烤、炒飯或意粉、雞咖喱、牛咖喱、海鮮咖喱、羊咖喱、蔬菜咖喱、甜品、啤酒汽水及特飲。如果見到咁多嘢有啲三心兩意唔知點揀好，枱面玻璃之下，已印有12款廚師推介及多張圖片嘅「宣傳紙」，藉此縮窄吓個範圍又睇吓易唔易啲搵啱心水。
胡椒餅（Papadam）．雜菜咖喱角（Vegetable Samosas）一坐低位都未坐暖，女侍應生就送嚟一小籃小食，唔喺花生，唔喺鹹菜，仲要免費。胡椒餅超薄超脆，又有黑胡椒香；而雜菜咖喱角喺傳統印度頭盤，餐牌中一客4件要賣$42，依家分文不收就送上兩件，印度咖喱角有別我哋港式嘅，外形漲卜卜，皮厚粉韌，入口有點鬆化，內餡填滿椰菜絲、青豆、薯仔，口感好實在。伴以一兜菠菜汁，一兜辣汁，辣汁好啃，最可惜覺得小小嘅頭盤，何需咁多醬汁，有啲嘥嘢嘅感覺。
芒果酸奶（Mango Lassi）$32芒果味勁濃郁，又香甜，真喺唔可以錯過嘅推介特飲。芒果酸奶濃郁成咁，因為成份只有芒果同乳酪，無溝水，芒果仲要用上印度阿芳素，真喺無得頂，所以乳酪嘅酸味唔太重，更易入口。
香燒馬友魚（Tandoori Fish）$128店家嘅黏土高溫烤爐主要做印度烤餅同一啲印度燒烤（天多尼），而依道香燒馬友魚亦喺店家嘅「Clay Oven’s Special」，實在有啲期待。馬友魚以鐵板熱騰騰咁送上，店長會詢問你要唔要加檸檬汁，他會用鋼夾幫手唧檸檬汁，食完一面，佢又會主動幫你反魚，服務方面非常到位。鮮魚採用南韓直送新鮮馬友魚，以香料醃製後放晌黏土高溫烤爐燒製，外皮烤得金香，魚肉很嫩滑，又帶有香料味，不愧店方特選。
瑪沙拉羊膝（Lamb Knee Masala）$136一客有兩大件羊膝，好多肉，肉質頗鬆化，而瑪沙拉喺混合多種具芳香性嘅香辛料所做，喺印度料理嘅萬能香料，用咗瑪沙拉煮出嚟嘅羊膝，香而不羶，辣度追適中，辣得嚟少少刺激，但又唔會太嗆喉，好似食到噴火咁，非常惹味，又喺推介之一。
蒜茸烤餅（Garlic Nan）$19既然叫咗個瑪沙拉羊膝，一定淨返唔少醬汁，點客印度烤餅蘸埋佢就唔怕嘥。除蒜茸味，仲有好多款烤餅，如洋蔥烤餅、芝士烤餅、薯仔烤餅、薑蔥烤餅、烤麥餅、原味烤餅……等等，所有烤餅即叫即做，黏土高溫烤爐1、2分鐘就烤好。蒜茸烤餅好鬆軟，而且蒜茸味好突出，其實淨食都已經唔錯，蘸埋啲瑪沙拉醬汁，唔食都知好好食！
印度皇飯（Pullao Rice）$29食完上面嗰幾樣嘢，我倆公婆都已經好飽，突然阿店長送咗碗印度皇飯我嘆，餐牌標價為$29一客，但眼前依碗只喺免費嘅試食版。印度米修長，加入大量甘筍絲、椰絲，以及黃薑粉嚟煮，據講黃薑粉有防癌、治療關節病嘅好處，個印度皇飯本身甜甜哋，黏黏軟軟。
最後，女店員捧嚟一大個「全盒」咁款嘅印度糖果盒，感覺幾新鮮，當中有咖啡糖、薄荷香草碎……等等，旨在清除一下口腔內嘅香料味。雖然未必啱人人口味，但試少少領略一下印度風情！
今晚兩個人食咗三百鬆啲，除勻每人都喺$160，環境好、服務好、嘢食好，可以列為值得翻兜之選。
Post
