Black As Chocolate (Closed)

知道太古城開左城品都冇去過潮聖，今日得閒就去睇下。 呢間城品同其他既一樣都係賣書之餘仲有其他品牌，見到一間鋪裝修高貴，於是行近去睇，咁靚既裝修原來係賣蛋糕！ 見到佢擺左蛋糕既sample已經好吸引好想試，有6吋同埋2吋揀。第一眼望已經比榛果朱古力蛋糕吸引，除左本身鐘意呢個味道，佢個賣相都好吸引。 揀左味道之後，店員即刻用一個好型格既黑色盒裝起蛋糕，再比左五種顏色既絲帶我揀。淨係講呢個包裝，已經係非常講究。至於餐具，有得揀天使同魔鬼 ; 天使係好似匙羹既餐具，魔鬼係好似叉既餐具，真係別出心裁！拎住個蛋糕番屋企既時候已經吸引到好多目光望住！ 食之前店員建議先由雪櫃取出十分鐘，6吋蛋糕當然係一家人分享。拎出黑色盒既時候，大家已經好期待。到打開既時候，大家都比出驚訝既反應，因為呢款蛋糕大家都未見過。 呢個榛果朱古力蛋糕夠鬆軟，切蛋糕既時候一切到位。朱古力味香但入口唔會太濃味，隻味幾討好，而且唔係"溜"果種，唔會食幾啖就食唔落。另外，係食到鬆軟既蛋糕同時，又食到脆脆，口感頓時提升。食完大家都一致讚好呢個蛋糕！