Video
Read full review
2011-09-04
99 views
師傅都有好一段日子冇外出食飯, 更有好一段日子冇同朋友飯局, 亦有好一段日子冇寫食評; 既然係咁師傅決定吹雞, 約埋大聲, 肥鄧同埋串爆黎個飯局, 美其名飯局相聚, 實質係互數不是, 互相攻擊! 飯店起初由大聲揸莊, 於是就揀左阿鴻小吃, 點知大聲當日掛住同人講數, 加上之前又打唔到去訂枱, 喺咁辦事不力的情況下, 師傅唯有同串爆先行, 去到先至知道阿鴻小吃落閘放狗, 原因係內部裝修, 相當失望之下串爆就提議黎呢間食店!正所謂唔喺自己地頭, 師傅唯有二仔底都死跟, 會合埋肥鄧就去攞位, 點知去到間食店人山人海, 伙計話知你係四大家族定四大探長, 都一於冇面比, 叫肥鄧攞完飛就企出去外面等, 唔好阻住個地方, 無奈嘅情況下唯有照辦! 講真企出去真係唔多想, 因為外面冇空調, 可幸當天氣溫唔算太濕太熱, 如果唔係都有排受!等左十分鐘到, 大聲亦都到埋, 師傅唔知大聲有冇做過啲咩, 不過大聲一黎到就有位, 所以喺呢件事上亦叫幫到手, 為佢個 “大”字頭挽回少少分數啦! 一如慣例, 有大食大, 所以由肥鄧發板, 其實肥鄧都係第一次黎, 但佢就好似熟咁, 望兩望就已經可以落單, 一口氣就柯打左梅
正所謂唔喺自己地頭, 師傅唯有二仔底都死跟, 會合埋肥鄧就去攞位, 點知去到間食店人山人海, 伙計話知你係四大家族定四大探長, 都一於冇面比, 叫肥鄧攞完飛就企出去外面等, 唔好阻住個地方, 無奈嘅情況下唯有照辦! 講真企出去真係唔多想, 因為外面冇空調, 可幸當天氣溫唔算太濕太熱, 如果唔係都有排受!
等左十分鐘到, 大聲亦都到埋, 師傅唔知大聲有冇做過啲咩, 不過大聲一黎到就有位, 所以喺呢件事上亦叫幫到手, 為佢個 “大”字頭挽回少少分數啦! 一如慣例, 有大食大, 所以由肥鄧發板, 其實肥鄧都係第一次黎, 但佢就好似熟咁, 望兩望就已經可以落單, 一口氣就柯打左梅菜蒸茄子, 炸蠔, 一口羊, 咕嚕肉, 椒絲腐乳炒通菜, 敗家仔炒飯同埋由伙計推介嘅燒雞半隻! 伙計仲話平時冇得柯打半隻, 係咁啱隔離枱要左半隻; 喺呢一刻串爆即刻發揮佢串咀嘅本色話: “如果我地唔柯打呢半隻,咁隔離枱咪冇得食?” 當下伙計啞了, 而肥鄧, 大聲同師傅都笑了!
落完單後, 當然唔少得就係啤一啤, 最後揀左支哈爾濱啤! 未啤前先見到支啤酒, 一眼望埋去十分冰凍, 再見到伙計攞四隻碗黎啤, 呢種感覺好似返左去古裝街咁, 肥鄧話啤酒倒出黎真係有少少冰, 師傅覺得啤酒最緊要唔係咩野牌子或味道, 最緊要係夠凍, 淨係呢一點已經值得加分! 飲勝過後, 第一道菜已經登場, 就係梅菜蒸茄子, 先講下梅菜, 食梅菜師傅最怕就係梅菜太硬, 入口後發覺軟硬適中, 而味道亦不太咸又唔會太甜, 洽到好處, 而茄子亦夠腍身, 最重要係唔會食完茄子令到個口底條脷唔舒服, 呢道菜絕對開胃惹味, 水準之作, 絕對係必食之選; 而作為當晚嘅之首, 更令師傅十分期待餘下嘅餸菜!
接住落黎係一口羊, 炸左嘅一口喺面配上芥辣, 賣相十分吸引, 入口發覺外脆內鬆, 一d都唔油膩, 加上羊肉酥香, 一口一粒確實過癮, 而芥辣份量洽到好處, 絕唔會喧賓奪主, 如果喜愛羊的必定要試, 師傅更覺得係佐酒必備, 掂呀! 咕嚕肉亦係一道令人驚訝嘅菜式, 皆因咕嚕肉同咕嚕汁係分開上, 師傅食左咁耐咕嚕肉都係第一次見肉同汁分開上, 咕嚕肉炸得好香脆, 而且肉身好鬆, 啖啖肉, 而咕嚕汁就比較酸, 不過就勁開胃, 將咕嚕汁同肉撈番埋一齊, 入口感覺係正, 因個汁好稀, 唔會好似其他食店嘅汁咁杰, 加碗白飯應該妙絕!
椒絲腐乳炒通菜嘅通菜係水通, 其實師傅從來都唔鍾意食水通, 皆因怕水通太硬身, 不過入口發覺通菜唔硬, 而且十分嫩綠, 加上腐乳味香不過唔咸, 味道真的掌握得好好, 師傅好耐都冇食過咁高水嘅通菜, 正呀! 燒雞嘅雞身好滑, 肉身鬆軟, 而雞皮並不是很脆, 帶少少韌, 不過都唔太影響整體嘅水準, 如果可以脆少少師傅覺得會更吸引! 敗家仔炒飯其實即係瑤柱蛋白炒飯, 至於點解咁叫師傅就不得而知, 不過呢個炒飯嘅水準甚高, 因為飯炒得乾身, 入口爽口, 加上配料新鮮, 因為師傅食到有帶子, 仲好爽口添!
炸蠔一碟有六隻, 蠔夠香又多膏, 夠鮮同肥美, 而且炸得勁脆, 炸粉亦唔厚, 加上熱辣辣, 好鬼好味; 但師傅唔明點解嗰位伙計話送多隻比我地? 大聲, 肥鄧同串爆都諗唔明, 就算反轉隻碟都唔覺有, 不過呢次串爆就笠水冇出聲, 唔知係咪驚生命受到威脅呢? 何以咁講當然事必有因, 話說食食下, 肥鄧忽然喺碟椒絲腐乳炒通菜搵到條鐵線, 都幾長架, 真係唔知係邊幫人嘅傑作, 究竟係唔妥我地邊一個呢? 而食鹽多過師傅食米嘅肥鄧, 就係咁易向店方反映下, 而店方亦好識做, 再送過另一道梅菜菜心蒸豆腐! 店方好明顯對梅菜好有信心, 而梅菜一如師傅之前所講咁有水準, 而菜心亦好腍好甜, 勁嫩綠; 加上豆腐十分滑身, 一d都唔老, 好好味呀!
總括黎講食物質素真的不俗, 環境當然一般, 不過亦可以接受, 喺市政大廈裡有冷氣, 而衛生情況亦可, 價錢就相宜, 以上食物加三枝大啤, 每人都係百六, 高水準相宜消費, 絕對抵食! 呢間食店作為食團首聚絕對係好好嘅選擇, 肥鄧, 大聲同師傅對串爆嘅介紹絕對收貨, 所以笑臉係一定會比, 有機會一定會再黎, 師傅呢一刻已經非常期待下次嘅食團來臨!
Post
