吉吉點 (Closed)

老友話帶我去飲茶，我問佢去邊間酒樓，佢答我去佢就知喎。行下行下，佢話到左，我話咪玩喎，邊有茶樓呀，佢指住條巷仔話裡面就係，我心諗咁隔攝邊會有好野先。個人比較鍾意食腸粉，老友介紹我呢個布拉腸粉，呢份腸粉係無餡，心諗應該無咩特別，腸粉質地夠薄，但係頗挺身，幾有口感，腸粉身夠滑，但唔係靠油所以滑，本身係幾乾身，所以腸粉味道係由自本身質地而非醬料。腸粉食完無餡就食有餡既，呢份係牛肉腸，腸粉皮夠薄夠嫩，牛肉餡就好飽滿，仲有蔥粒係裡面份外香滑，至於牛肉就僅熟，免治牛令腸粉更滑。至於蝦餃皇都係幾有皇既味道，因為蝦肉餡夠飽滿，而餃皮就係好煙un既口感。最後食埋甜品，係紫薯酥黎架，酥皮夠脆薄又好有油香，而酥皮一塊塊好薄咁包住紫薯餡，餡就唔會勁甜，趁熱食係幾鬼正，不過好飽肚食唔到好多舊。呢間本土小店俾到驚喜我，飲茶唔一定要酒樓既。