老馮茶居 (海寶花園)

呢間小店成日排長龍，今日試咗，佢D點心真係有料到。雖然塊皮唔算好薄，不過蝦餃D餡都幾新鮮，D蝦肉有彈性。佢個潮州粉果反而有驚喜，塊皮唔會黐立立一pat pat，入面嘅餡料同樣新鮮，尤其是佢個花生同埋沙葛。呢度嘅炸芋角都做得唔錯，炸得夠鬆夠脆，但係又唔會食到成口油，入面個芋蓉都幾靚。山竹牛肉係廚師推介咁就梗係要試下啦，呢個都做得出色，唔會有嗰陣梳打粉乸過嘅味，牛肉球入面啲牛肉有粗有幼，咬落去質感口感都幾好。蔥花蝦米腸夠滑，就咁點麻醬甜醬辣醬已經好正。叉燒包啲叉燒幾靚，唔會因為諗住塞喺個包入面就求其拉搵啲肉加啲叉燒醬入去就算數。鴨腳扎最勁就係有柚皮，真係好耐冇食過柚皮。