小叻沙 (Closed)

環境4分：比普通茶記光猛企理，Ｄ枱呀櫈呀都用左好多足球theme，可以畀四分。衛生5分：地方都幾乾淨，枱有筷子，開水自己去自助區拎，值得加分就係食龍蝦有名牌Tempo紙巾送，所以畀夠佢五分！服務4分：新店嚟講呢樓面算超多人，個個態度都幾好，落單好快就有得食，清潔又夠爽手，四分。味道5分：1)      波士頓龍蝦叻沙一上枱就見到一隻波士頓龍蝦分開兩邊，見到龍蝦肉有微微嘅燒過，零舍好味。而果兩隻鉗就已經被刀劈開過，見到裂痕好容易拆開嚟食。佢地另外畀隻碟你裝龍蝦殼，又有刀叉又有包紙巾，果然夠細心。碗叻沙份量都唔細，而且湯底夠甜又唔算好辣，份量又夠足。2)      蝦多士尺寸差唔多一隻手掌咁大，隻蝦都算夠大，炸到好爽脆，真係唔使半分鐘就食曬。3)      食叻沙加二十蚊有兩條香口嘅沙嗲，牛肉同雞肉間最好食都係啲肉最淋嘅雞肉沙嗲。4)      秋葵有微微燒過，冇太多黐立立嘅感覺，點啲辣醬就更加好食。5)      炸雞鎚又熱又脆又軟熟。6)      大熱天時加杯凍檸茶就最爽。抵食5分：138蚊有成隻龍蝦你食，仲要加埋靚麵底，又唔使加一，絕對超級抵食。