龍蝦寶寶 (Closed)

早兩日見到報紙介紹呢間龍蝦寶寶，由於公司都o係中環，所以就同同事去試下~我叫咗碗濃湯龍蝦烏冬，同事就叫咗龍蝦孖寶同龍蝦花枝丸~碗烏冬有龍蝦肉、流心蛋、菇同菜，烏冬份量唔算太少，龍蝦肉幾甜，爽身，不過唔算多，得幾舊。湯底係濃湯，橙橙紅色，不過味道其實都唔算好濃，自己本身以為佢係勁濃。至於烏冬，就唔太入到湯味，可能煮的時間短，味道比較淡。碗烏冬以中環黎講，食到龍蝦，HK$98都ok啦。我同事點的係龍蝦孖寶(HK$88)，即係蝦子腸粉同龍蝦碗仔翅。另外再點了個龍蝦花枝丸(4粒)。腸粉一般啦，有D龍蝦汁o係底就出到D味，龍蝦碗仔翅唔算大碗，但勝在有龍蝦肉在內，幾甜。值得一讚係個龍蝦花枝丸，雖然得4粒，但好惹味，龍蝦味好出。中環黎講想食平價龍蝦菜式，呢度都OK啦。