Cafe 1950歐陸餐廳 (Closed)

今晚又做無飯煮婦，本來打算去大圍椰林閣，點知已經關門大吉，咁唯有去第二間啦，突然靈光一閃唸起美林好似有間新野，咁又去試下啦，美林商場其實喺大圍過去好近啫。一入到去個商場，好容易就見到有間咁特別嘅餐廳，但感覺餐廳同呢個屋邨商場有點格格不入。餐廳佔地都幾大，環境裝飾得幾有特式，坐位亦好闊落，同埋有好多卡位。打開餐牌，有各國小食，有泰式、韓式、美式、西班牙、德國，總之咩都有少少咁，叫人難以選擇。 羅宋湯淡而無味，水一樣咁，好失望，仲以為呢啲西餐廳會做得好好添。 泰式炒飛天通菜，味道不錯，麵豉醬略嫌甜左點，但總括嚟講炒得好味，好香口，只是份量太少了，$52一碟，得果幾兩菜。 西班牙海鮮飯，配料都幾足，有魷魚，蝦、青口，番茄味道突出，燴飯軟硬適中，吸引。 呢個係推介嘅石頭泡菜豬頸肉炒飯，只係泡菜略嫌酸左點，豬頸肉份量也足夠，貼近石鍋烘一烘，口感更香脆可口，食石鍋飯就係最愛佢有嘅飯焦，少少焦而不燶，口感更佳。西班牙飯同石鍋飯都係套餐，新張期內，飲品無限添飲，我地飲左可樂、道地檸檬茶和一杯紅茶，總括嚟講都勉強夠飽啦。