原味棧 (Closed)

今日同老婆約左表弟同舅母行黃埔裝修完嘅Aeon再開餐, 跟住可以帶舅母去新開嘅黃埔站搭地鐵。收工係北角搭船好快就到紅磡碼頭, 我地集合之後行左一陣Aeon就出發去表弟同事推介我地去嘅"原味棧"。由黃埔站行去工業區果邊大概10分鐘就搵到。原味棧位於崇潔街, 如果唔上openrice都好難搵到。餐廳裝修都幾雅致, 餐牌設計好有特色。我地今日黎食每位$208嘅火鍋套餐, 除左任食火鍋配料外, 仲附送豪華海鮮拼盤同美國安格斯手切肥牛片。鍋底我地揀左火焰魚, 店員會加酒落鍋之後點火, 全鍋著火好有做型。😎豪華海鮮拼盤超級豐富, 有龍蝦, 鮑魚, 象拔蚌, 海蝦, 蟶子等等, 全部都好新鮮, 鮑魚郁下郁下咁上枱, 老婆好興奮仲拍埋片。😂新鮮龍蝦每位有半隻, 開左邊, 食得好方便。龍蝦肉好爽口彈牙, 龍蝦肉味濃。👍其他餐廳只係份龍蝦都唔平。🙈豪華海鮮拼盤份量好多。鮑魚郁郁下, 好軟腍, 肉好厚身。美國安格斯手切肥牛片肉味好濃, 老婆唔食牛, 益哂我同表弟。😋任點配料都好吸引, 不過食完火焰魚, 海鮮拼盤同肥牛後都8成飽, 我地都唔食得多。埋單真係全無雜費, $208一位堅抵。👍