上海婆婆336 (Closed)

平時食上海蘇杭菜都係揀晚餐時間去，午餐食都係第一次，原來都唔錯，有麵有小菜套餐揀。繁忙嘅工作天，忙裏偷閒喺午飯時間同朋友一齊享受一餐有賣相清雅有質素嘅午餐。惠顧小菜套餐送絲苗白飯一碗同酸辣湯一份，酸辣材料足，食落每啖都多配料，但我唔食得辣。惠顧午餐加$15可配一份餐前冷盤。雞絲粉皮，粉皮分明，加埋清新嘅配料同埋醬汁，食落有涼浸浸嘅感覺。鎮江肴肉，鹵涷精透，肉唔會太鹹，亦夠爽口。四喜烤麩，麵筋吸收咗湯汁，唔會太淋。336小籠包，包夠薄又唔會一夾就就穿，湯汁豐富，好味。干貝賽螃蟹，蛋白嫩滑，唔太油，清清哋，幾好。松子黃花魚，對魚頭情有獨鍾嘅我以前食嚫上海菜都會叫砂鍋魚頭煲，一直都好想試呢個，因為係炸關係魚肉唔講得上係嫩滑，但入口鬆脆，差唔多成條魚連骨都可以食，濃厚汁料配上少量蝦仁及水果粒，酸酸甜甜好開胃。松仁糯香牛柳粒，松仁香口，牛柳粒有鑊氣，白色類似年糕嘅粒粒口感煙韌香糯，特別嘅配搭。牛展湯拉麵，牛展炆得鬆軟，麵質爽口。加$10配酒釀丸子一碗，酒釀味濃，但係我鐘意甜，再甜少少啱我啲。