三日月

Open Now

Now Closed

平時好少午餐食鐵板燒，不過知道呢間鐵板燒嘅午餐定價幾抵食，就嚟試吓。講緊$498嘅餐，可以食到龍蝦，性價比都唔錯。如果覺得龍蝦太過矜貴，純粹只係想食普通嘅鐵板燒，呢度會有個輕食餐，都係$249，就已經有紐西蘭西冷牛肉做主菜。仲要星期六日都係做呢個價錢，尖沙咀嚟講係好抵食！當然龍蝦餐就會多啲嘢食啦，而且佢嘅炒飯同輕食餐都會有啲唔同，佢會用咗櫻花蝦同埋自家製酸梅去炒個飯，炒飯變咗粉紅色入口酸酸地，幾開胃。另外食完個龍蝦之後，蝦頭會拎去煲個味噌湯，呢個都係輕食餐無嘅。我最欣賞當然係龍蝦啦，師傅控制過生熟程度幾好，調味簡潔，本身個鮮味已經突出。整體食物質素都高，最鍾意睇到佢啲師傅整嘢食嘅過程，如果可以記得訂吧枱。如果有四至六個人嘅話，我覺得佢嘅包廂都唔錯，房間裏面有鐵板，師傅淨係會serve自己枱人，真正VIP房。