鳴門魚市場居酒屋 (Closed)

係咁既，話說噚日下晝有人見到雜誌介紹 $98海膽飯，二話不說即約飯腳即晚試，雖然鳴門唔係第一間出 $98海膽飯，但本著在家附近不況一排心態去。9點開始入座，8點到達唔見人龍（可能3號先有報導關係啦），但我都唔敢走開，因為每晚限量供應大約60碗，所以決定被罰企一個鐘，但到9點都唔係60人可以入晒去架，因為座位有限，排後果d分分鐘要等多一個鐘，我哋排第5/6就可以先嚮受，一坐低店員就即刻遞上茶，同時會問 ”係咪落咗每人一碗海膽飯先”？呢種貼心服務令我非常讚賞，因為非常期待又非常攰同肚餓… 唔駛一分鐘壯觀海膽飯就呈上啦！先從海膽講起，店員會介紹海膽產地，最中間係加大拿，而左右兩邊係日本同韓國，份量係整碗飯既3份1，飯就佔3份2，所以用一啖海膽一啖飯嚟形容都唔誇張，我覺得加拿大海膽最有口感同帶點兒苦澀，日本最濃味，而韓國就清淡所以火炙，整體質素係中上，呢個價錢嚟講我會用超值同大滿足嚟形容！其實一碗飯唔係大架，但宵夜嚟講係有餘，所以唔駛叫其他食物，兩個人兩碗飯埋單 $215，有機會都想再食，供應期到11月尾咋！