MT.8848 Himalayan Cafe & Restaurant

Open Now

Now Closed

今日同朋友想有啲突破，所以揀咗間新開嘅尼泊爾餐廳，見佢乾淨企理，燈火通明，環境又幾好，就做下白老鼠啦！最初去到無乜人，但過多一陣就full house了！一半尼泊爾人，一半香港人，感覺有啲似去咗旅行咁，有feel呀！我哋叫咗兩款豬肉Momo，即餃子🥟。一款係蒸餃，另一款係辣甜酸炒餃，兩款都好好食！個人比較鍾意蒸餃，清清哋，無咁膩。甜酸餃個汁同我哋中式咕嚕醬相似。另外我哋叫咗酥炸茄子🍆，外皮香脆可口，超正！點上辣醬更惹味。水牛肉乾，都幾硬同乾身，味道好特別好地道，香料味好重，試一次就夠。另外我哋叫咗一個超地道嘅拼盤，中間灰啡色物體係混合谷物米糊，味道好特別，可點上咖哩醬或乳酪一齊食。拼盤當中有幾款「尼泊爾泡菜」，比較鹹，但好惹味！我哋都點咗喜馬拉雅奶茶，茶同奶味都好淡，有啲失色，下次唔會叫。一次好難得的用餐體驗，職員好用心介紹同解釋每一道菜，十分親切。