八妹雞煲

Open Now

Now Closed

Item: Bamei Chicken Pot
Rating: 3
Author: 奧志雷

Bamei Chicken Pot

4.5

540 Reviews

Taste

Decor

Service

Hygiene

Value

14684

Tai Po

$101-200

Sichuan Hot Pot Chicken Hot Pot

467

奧志雷

Level4

2.1K

Read full review

失驚無神又雞煲，食過翻尋味？報名人數非常擁躍，好多朋友仔都一齊食，真係要叫兩隻雞先夠食。Lunch 飲完蔡潤記勁辣既辣椒油後已經開始有點肚痛，一於少理話之佢，繼續辣雞煲，美食大過天 ﹗

新開八妹雞煲晚市都幾旺架喎，人山人海，排晒長龍。洗唔洗咁誇張呀？六點半已經排晒隊，唔洗錢咩。上網調查一下，開到零晨兩點而且有分店添喎 ﹗唔想企係門口等位，食西北風當前菜咩 ﹗梗係叫外賣去對面 Baby 慢慢嘆好過啦，而且有大量酒精供應、有電腦鏢掟、有卡拉 ok 唱、有啤牌玩、有乾淨企理獨立廁所用、地方寬敞、服務殷勤有禮。

八妹唔送外賣？仲要比 $300 大元按金先可以借煲？算數，我地豪比您。雞煲到會，應該係外賣自取先正確 ﹗長髮綣毛阿姐一款唔休做嘴臉囉 ﹗眼見全部都係頂手頂腳既二人迷你檯，放個煲已經無位剩，多人先會合體。舖面迫夾、通道勁窄、檯椅密麻麻，一睇都知坐得唔舒服。

仔細研究一下 menu，食材選擇都不少呢，而且有海鮮及前菜小食供應，不過價錢都算貴。我要遲少少到場，朋友們食住等所以起筷先喇。好一頓豐富既船河後晚餐，Good Good Good，幸福又滿足，好好味架呢 ﹗食都係其之，最緊要成大班朋友一齊食，特別開心、特別滋味 ﹗第一次食得最多唔熟食物，雞子唔熟、豬紅唔熟、生蠔唔熟、芝士鱈魚魚蛋唔熟、豚肉唔熟、田雞唔熟、等等等唔熟，哈哈。

痲辣雞煲一隻中辣，配料有紫洋蔥、生薑、芫茜、黃辣椒仔、花椒、等等，多謝 $188 蚊，合理價錢。初時無咩味道，要餚返十多分鐘，醬汁漸漸濃郁收乾，香菜配料開始出味，味道帶麻而微辣，香氣撲鼻，口水即時失控地流呢 ﹗雞件滑滑，肉多骨少，每口帶著肉汁跟辣汁，先辣後麻，最後甜味湧上，真心好味道，讚 ﹗

紫洋蔥、蒜子熟透索汁，香甜味美，如果有碗白飯親托下就真係無得頂呀 ﹗大家都食到唔停口呢，搶呀 ﹗加上湯打邊爐前，用芋絲、竹笙、響鈴、牛柏葉、等等，總之要吸湯力強，索盡痲辣汁，一野啪落口，熱燙燙爆開，正到震 ﹗

痲辣雞煲辣一隻走辣，唔辣邊好食架，味道似三杯雞，濃烈甜甜的醬油味道，雞都依舊美味既，一試無妨。我自己另外叫個痲辣汁大辣自私食，無問題既！唔辣就似甜醬油雞唔好食，微辣又唔夠惹味，到喉唔到肺，中辣味道就剛剛好喇。夠香夠辣又夠痲，最後帶點點甜味餘韻。食大辣只不過為左份超刺激勁痲痺既高潮感覺，全身冒汗濕透 high 到爆，但會蓋過所有食材味道呢，而且會有火燒後欄既危機添 ﹗

藥膳醉雞鍋一隻，靚湯一滾，天使都企唔穩，香氣一巴巴地車埋黎 ﹗雞件都未落已經如此薰芳撲鼻，落埋雞仲得了既 ﹗湯底真材實料無搵苯，酒香清甜香噴噴，濃郁宜人可口藥材味，好想飲反碗湯呢。雞肉嫩滑多汁，食完一舊又一舊，正喎。

痲辣汁大辣，多謝 $12 呢。依個汁不得了，濃縮加強版，無溝湯直接浸黎食就更加辣，成舊雞浸完先食，地獄濃縮版，地獄級刺激，好鬼 high 呀 ﹗一般都係加落湯度，我就直接食。勁呀，勁痲勁辣，越辣越爽越刺激，頭頂出煙、全身發滾，辣到出晒水，一路滴汗、一路食雞，食得津津有味。飯後火燒後欄都在所不惜，好采唔係好嚴重乍！

手切本地肥牛，難得較以往質素好，不過都係可有可無。微弱的牛味，脂肪香甜味欠奉，質地滑溜溜，合格唔難食，過過口癮可以。安格斯肥牛，跟本地肥牛差不多，算罷啦。一向八妹牛都係麻麻地，淡而無味，質感腍劈劈，到底係咪用過鬆肉粉呀？翠榮手切牛頸脊好百倍，特濃牛味加上豐富肉汁，鮮甜味道，八妹無得比。

火雞子，誇張地超巨形。滲透濃濃麻辣汁後，沒半點腥嗅雪藏味，剩下脆脆外皮、嫩嫩多汁香肉，好味喎。鮮雞子，有驚喜 ﹗居然有新鮮本地雞子，唔洗食有腥味雪藏火雞子 ﹗本地鮮雞子有種獨特又香濃既雞蛋黃香味，甜甜又甘香，而且質感棉滑非凡，味道出眾，實在係無敵鮮甜可口美味。

炸薯仔，對我來說是個新嘗試，從未諗過薯仔可以打邊爐。炸過既薯仔好香口，而且索汁一流，最愛烚到透徹，完全吸收湯汁，無得頂。芝士豆腐丸，感覺好似鱈魚魚蛋釀左芝士，唔似豆腐喎，味道幾有趣，唔難食。

芝士鱈魚魚蛋，痲辣撞芝士怪怪的。芝心丸，外爽內流心，大路無投訴。魚皮餃，滑而韌又帶腥，免免強強。新加坡魚蛋，老闆話真係新加坡搭飛機黎架，有咩特別呢？質感彈牙，濃郁鮮魚味而散發著清新咸香，有料到，食得過，又真係幾好食，推介 ﹗

黑豚肉，何解腍劈劈又鞋烚烚既？不脆不爽不彈，out ﹗雞髀菇，正常普通料，微爽微彈，輕輕的菇味，可塑性高，什麼湯底就什麼味道。脆鯇魚腩，切得公正又厚薄剛剛好，色澤鮮明濕潤。浸幾分湯即起，咬落脆卜卜又爽彈，而且仲勁多肉汁添呀 ﹗肥美香甜的魚脂非常甘香，可口肉質帶著微弱草青味，吸引濃郁麻辣汁後都食得下喎。

萵筍，我一直覺得係大陸傳入，但朋友話係台灣傳入架喎。萵筍即油麥菜莖部，鮮艷翠綠既顏色尤其吸引。因為覺得好好味，所以追查其身份之迷。灼一灼即食，非常爽脆多汁。炆一炆慢食，軟棉滑滑吸盡湯汁，一咬爆汁像食瓜一樣。一種食材，兩種食法，同樣 good fit。

野生竹笙，簡單的菌類，好少話會難食，必選生料之一 ﹗索盡雞煲辣汁精華，啖啖爽脆、啖啖爆汁，不得了 ﹗田雞，肉質腍劈劈，一咬即散，不結實、不彈牙，新鮮度強差人意。

熟牛坑腩，第一次係火鍋店見。已經熟透架喇，估您唔到咁都比您諗到。已經烚熟既牛坑腩原汁原味，掉進痲辣鍋讓他自由地游游水，用黎索汁超正 ﹗要比多一點耐性，要夠諗就要花點時間索夠汁先得，如果就咁食會好淡口。吸收醬汁後直跳入口中跟舌頭一齊翻騰，牛味非凡，散發著美味痲辣味，質地鬆化，彈牙結實有嚼勁，嫩而無渣，比肥牛出色多倍，好味道。

日本蠔，入晒雪，無洗過，綑晒黑邊，賣相一點都不討好。烚完後，味道帶腥，腍劈劈唔堅廷，仲縮晒水添。八妹海鮮及牛肉同樣麻麻地，如果唔係朋友仔想試，都唔會 order。

響鈴，當真即叫即炸嗎？可能係真喎，油淋淋反晒光出場，溫度微暖。用筷子夾住拖一拖夠鬆化，不過油味濃厚喎。我最愛掉件響鈴自由地浸浸辣湯，浸得軟棉透徹最好食，嚥韌滑溜，舔舔嘴。香菇貢丸，濃濃菇味香噴噴，肉丸爽而微彈，滲著肉汁，比棒球貢丸更美味。

午餐肉，以前的我絕對唔會用、亦唔會諗到午餐肉打邊爐，而且硬係覺得係 cheap 野。直到痲辣鍋盛行，有朋友仔 order 喎，一試即時眼前一亮呀 ﹗讓午餐肉慢慢沐浴在湯汁之中，充份吸引所有精華，變得嫩滑非常，不是平時的質感呢。一趙湯汁激射，香氣飄飄，味道散發著肉香又夾雜香料，好鬼好食啫 ﹗

韮菜餃，皮厚死實，餡料香甜欠棒無生命，入得口唔難食。外購貨又雪到入晒雪，點及成仔記日日新鮮包既韮菜餃呢 ﹗棉棉冬瓜片、粉粉薯仔片均是吸汁高手，讓辣汁更加濃縮，入口爆汁，刺激到額頭冒汁，好 high 啊。

牛柏葉，灼一灼即食，勁爽呀 ﹗掛滿痲辣汁，好鬼正，最敝朋友仔落湯太多，搞到過淡，無晒味囉。油麥菜，非常少食既一種菜，突然想食。滿意滿意，爽嫩不粗糙，跟痲辣汁都幾夾，好味。紹菜，又稱黃芽白，又稱大白菜，超甜又多汁，但硬係有種太普通、太平價，cheap cheap 的感覺。

黃帝菜，以前的我最怕，因為草青味道使我作嘔又反胃 ﹗但近年已經克伏左喇，仲越食越喜歡添，依家發覺同麻辣湯底非常之夾，超級好味呢 ﹗爽嫩甜美又多汁，一條一條不停地送入口，大愛。豬紅，腥味強勁，質地不夠滑溜多汁，硬掘掘，不喜歡。豬潤，最緊要望到實，睇準時機即時起菜掉入口 ﹗烚得剛好無過火，不鞋不韌不乾，爽滑細緻，中間微微粉紅，鮮嫩泛著麻辣味，非常滿意。

美國桶蠔，無洗過直接上檯，黑色的裙邊。巨形桶蠔帶子位及裙邊都有渣，全數吐掉。慢慢烚到收乾水，當蠔肉變得實淨肥嘟嘟，係機會喇 ﹗狠狠地咬入口中，肥美蠔味濃濃、蠔汁豐富，好滿足啊 ﹗

金菇、竹笙、生菜，大路甜美爽爽無投訴，掛著大量辣汁趙得開心又興奮。牛丸、芝士腸，大路外購唔難食，食左都唔記得。鮮腐竹，滑滑索味都不錯，仍能食得到豆香。棒球貢丸，size 巨形好新奇，免強塞到入口都趙唔到呢。淨豬肉貢丸無香菇，味道同質感都跟紮肉一模一樣，單調的肉丸味道，幸好有咬口。

扭紋薯粉，跟痲辣簡直是天作之合，扭紋比滑嘟嘟薯粉掛湯力更強，同樣嚥韌勁彈又滑溜，帶著大量痲辣汁跟舌頭打滾，濃濃辣味直衝腦袋，好 high 好食味好刺激 ﹗

手打烏冬，最緊要時間將握得好，滑溜嚥韌、米香出眾。幾乎永遠都係壓軸出場，索盡所有菜肉、海鮮精華，連麵帶湯啜入口，滋味無窮，味道百鳥歸巢、複習豐富，好好味啊 ﹗

八妹雞煲 Open Now Now Closed

八妹雞煲

Open Now

Now Closed