泰玖

Open Now

Now Closed

之前見ViuTV節目「準時開飯」曾經介紹過餐廳，今日終於有機會去荃灣一試佢哋嘅美食。餐廳樓高兩層，空間寬敞，裝修走工業風。餐廳亦有做午市套餐，CP值高，抵食夾大件，食物的定價貼地。間唔中去食晏都係一個唔錯嘅選擇，只可惜唔係附近返工。講返食物，泰玖金磚蒜蓉包烘得金黃香脆，蒜蓉味香濃，店員都提醒我影相打卡要快，因為要趁熱食先至好味。泰式拼盤有炸雞翼、雞卷、蝦餅同魚餅。雞翼切開咗成單骨，食起上嚟方便多。全部都新鮮炸起，香脆唔肥膩。泰玖招牌蟹肉煎蛋卷，煎得香香熱熱嘅蛋卷，裏包住超多嘅蟹肉，面頭再加上蟹柳碎同蟹籽，口感滿滿。泰式馬拉盞炒椰菜苗，炒得好香，菜苗嫩、口感爽。而且份量都好多。食物份量大到想叫多個粉麵都唔驚食唔哂。所以最後直接叫個甜品。泰式芒果糯米飯、飯夠哂軟糯溫暖，味道好平衡好好味。菠蘿活性乳酸菌屎樂冰，成支益力多混落去嘅沙冰飲品，所以充滿益力多嘅味道，而且同菠蘿好夾，既消暑又解渴。