M Kitchen (Closed)

朋友推介呢間餐廳，今晚終於有機會試吓。 餐廳超貼心，一坐低就每人先提供一杯抗疫湯水，味道都唔錯。 我哋今日點咗金蒜香雞飯、蟹子楊州炒飯、黃金賽磅蟹飯。金蒜香雞飯 - 呢個飯非常香口惹味，啲雞外脆內軟，雞肉仲有肉汁，唔會煮到好乾好柴，個飯配埋啲乾蒜一齊食真係超好味，呢個下次一定會再叫嚟食。蟹子楊州炒飯 - 雖然好似好普通，但個飯係炒得好好，個飯炒得夠乾身，炒到一粒粒，好有咬口，味道亦剛剛好，好夠鑊氣。黃金賽磅蟹飯 - 呢個係配白飯食，超好送飯。份量都唔少，仲有好多粒帶子仔同西蘭花，出面其他餐廳點會有咁多吖，咁嘅價錢真係非常抵食呀。餐廳環境亦坐得非常舒服，枱同枱之間距離唔會太近。員工服務態度亦好好，好有禮貌。真係好難得而家仲有呢啲食物質素好、坐得舒服、價錢又唔貴、服務態度好嘅餐廳，下次一定會再嚟呀。