Y Pasta (Moved) New Location

一大清早，公司會計小姐同船務部經理就發生口角，所以中午過後就孖小肥出咗去食晏，地點就由細佬揀咗喺附近間「Y Pasta」。樓上餐廳佔用面積全層，以藍白為主o既色調感覺光猛清新。白牆上o既油畫及語句都好正面，望多兩眼都令人心情輕鬆不少。店子左邊為開放式廚房。旁邊有個落地黑板寫出是日推介菜式。由於兩口子好遲先入座，手製意粉早已賣清，結果無緣一試，唯有每人點咗第二款午市套餐。每份套餐都包有一客沙律或餐湯。沙律用上紅莓醬調味，食落爽潤醒胃。會計小姐最愛食魚，主菜就揀咗客三文魚。鮮露荀牛油檸檬蝦意粉（$98）：XO仔決定得黎意粉主題餐廳午膳當然係要食意粉啦！細佬所點o既鮮露荀牛油檸檬蝦意粉麵條煙煙韌韌。鮮露荀翠綠清脆，蝦隻亦爽脆彈牙，輕輕以牛油檸檬汁點綴效果極度清爽，掂呀！午餐仲包有甜品同餐茶。是日甜品為清涼微甜香滑o既雲尼拿奶凍。小肥要咗杯熱o既澳洲天然蜂蜜檸檬特飲作餐茶，喝畢消滯暖胃，腸胃很是舒暢。「Y Pasta」環境幽靜潔亮，午市意粉套餐好味又抵食，大家當真不妨一試，cuz it’s good！