譽小館 (Changed Hand) New Restaurant

參加完活動後翻到上水都已經夜晚9點幾，成日無食過嘢真係好鬼餓，去譽小館嘆吓茶，食d點心，旨在消除一下一日嘅疲累。職員態度友善，逐一介紹點心紙上面嘅受歡迎食物。我哋就叫咗燒賣皇、雲南野箘餃、白灼通菜、金錢肚，再加個炸醬魚蛋撈麵。燒賣皇一上枱時真係有嚇親，估唔到咁鬼大粒，成粒迷你煎堆咁。有時好怕食燒賣，因為肥豬肉太多，一來唔健康，二來好漏，但呢個燒賣皇入面嘅豬肉肥瘦恰到好處，都唔錯。雲南野箘餃，係招牌點心之一，味道又真係幾好wo。雖然外皮蒸到有少少過火，所以好易散，但係入面嘅餡料係好香好濃嘅什箘，數得出有至少4種菇類。炸醬魚蛋撈麵味道未算突出，值得欣賞嘅係肉絲真係一條條粗條，可以品嚐到肉味同質感。白灼通菜我又真係無預期佢係咁靚，嫩口翠綠，唔會太油。配埋特濃嘅腐乳醤，呢碟菜堪稱完美！最後必須要講嘅就係碟金錢肚，少少辣，幾惹味，炆得夠淋滑，而且估佢唔到咁大碟！本身真係以為係點心份量，每人兩三件，點知佢有成二十件，搞到我哋失預算，食到overload ，飽到捧住個肚走！