Hangry Baby (Closed)

講到去九龍城搵食，大家一定覺得係泰國菜，火鍋等等。但小食就真係唔多覺，不過最近就係衙前圍道開左間串燒店，個名仲好特別叫Hangry Baby (該字是「Hungry」及「Angry」的混合，形容飢餓到發脾氣) 。招牌食物有大大只雞髀，燒到脆卜卜既雞翼，仲有超抵食海鮮，食完一定大滿足，咩脾氣都無晒。大家都知好多時串燒 燒烤店都會一早燒定。到有客人就翻燒幾下整番熱就算。但Hangry Baby 對出品好有要求，全部即叫即燒，雖然要等10幾分鐘，但保證新鮮，原汁原味。如果大家唔想等，可以先打電話落單，咁去到就有新鮮熱辣既串燒食。蘇老闆話佢地招牌雞翼燒到脆卜卜，唔脆唔收錢，可見對自己既出品幾有信心。海鮮我就鐘意大大只蟶子，夠晒彈牙又多汁。食左咁多肉之後，最岩食番啲蔬菜，我就最鐘意個茄子，份量十足，加左辣椒粉、孜然粉十分野味。仲未夠皮既話整番只12刀雞髀。「12刀雞髀」生燒，皮脆肉嫩，彈牙多汁，配白飯一流，堂食外賣都咁正。