Fuse Creations (Closed)

在中環Soho區嘅一間小鋪，店內氣氛幾浪漫，食物真係fusion得幾特別。頭盤小食係焗雞翼，整到成個串燒三兄弟嘅款，唔講真係唔知係雞翼，但係食落就好脆口，配上個小小飯糰波波，好襯又得意。豚肉拉麵，拉麵係店內自家製，有誠意而麵質又確實有啲唔同，豬骨湯底比較濃，豚肉好林。雞肉拉麵，煮落比較硬身，啱我口味，湯亦比較清又甜，雞肉好滑。番茄醬雞肉意粉，份量不算多，但味道好好。火腿(ham)加上沙律，配上薑蔥蒜油嘅醬汁，個汁幾特別。甜品係雪糕，都有啲特色，分別有海鹽同醬油味。醬油味真係第一次食，最初都有啲驚，始終覺得醬油加到甜點上怪怪的，但試咗第一啖就覺得好過癮，明明係食落係有種豉油味，但配上甜嘅雪糕又好似好得意咁。海鹽味味雪糕之前都食過，鹹鹹地甜甜哋都算得意。