Joyful Dessert House (Closed)

岩岩同老闆娘係銅鑼灣出血完畢，老闆娘指定要嚟駱克道呢間米芝蓮甜品店食番個靚甜品兼休息下佢對腳。呢版啲芭菲相落幾靚幾夢幻，應該謀殺咗唔少女士有限的纖食配額。栗子系睇落又係幾吸引。菜單內好多款都好吸引，今晚我就一於試下呢個車胎人推介嘅綠茶心太軟伴雪糕$64蚊， 一set有三樣，包括有綠茶心太軟，綠茶雪糕同埋中間有杯紅豆蓉。賣相一流。綠茶心太軟劏開佢真係好流，我點佢就係鐘意佢同時有綠茶本身嘅苦澀味又有香甜味。 個餅本身微熱，夾埋紅豆蓉同綠茶雪糕一齊食有冰火效果口感好正！然後整番杯荔枝玉露$44清清哋都唔錯。