大麥牛肉麵 (Closed)

今日去香港大學站附近覓食， 發現左呢間叫大麥既牛肉麵小店。 舖頭唔算大，大概只有十幾二十個座位， 但勝在簡單樸實。紅燒牛肉麵方面，除左一般見到既牛肉麵條之外， 仲有蕎麥麵可供選擇，亦都可以揀辣定唔辣。 我同朋友夾埋叫曬兩碗試試。 牛肉煮得好林身好香，而且麵條既軟硬適中， 吸埋湯汁食一流。而蕎麥麵比較爽身，都不失為一個好選擇。小食方面，我地揀左滷水拼盤（雞翅、雞槌、雞蛋） 同埋皮蛋豆腐。 呢度既滷水先係精華所在，能將普通食材瞬間昇華。 仲未食落口之前，就已經聞到陣陣滷水香，令人食慾大增。 再將滷味放入口中，你慢慢就會感受到呢度既滷水將普通食材提鮮既魔力。至於豆腐皮蛋，除左有豆腐同皮蛋，亦鋪有一層香口既肉鬆同醬油拌碟。 食落去鮮，香，滑，值得一試。飲品方面，我地叫左杯桂花薄荷酸梅湯。 桂花既陣陣幽香以及冰涼既薄荷，同酸酸甜甜既酸梅湯融而為一， 大熱天時飲一杯，簡直消暑解渴涼透心啊