Lúa (Closed)

今日落大雨，想揾間好坐啲既餐廳，呢間之前嚟東角bookmark咗想試，餐廳有用心設計，環境幾靚，有地下同二樓兩層，待應帶咗我上二樓用餐。今次食lunch試咗A餐豬湯檬($78)+熱越南滴漏黑咖啡($12)，但餐廳有加一收費，埋單要$99。A餐豬湯檬($78)跟香菜，香菜自動另上。湯檬好夠熱，湯底好濃郁好好味，扎肉好有咬口，口感幾好，豬肉丸都唔錯，其他配料都好味。食到中途加少少辣醬調味，但覺得自己做錯咗，碗湯檬本身幾好味，其實唔洗額外加調味已足夠。熱越南滴漏黑咖啡($12)之前試過其他越南餐廳既越南滴漏咖啡幾好味，今次加錢試埋，揀咗黑咖啡走甜，有點後悔揀咗唔甜，杯黑咖啡本身無豆味，太苦澀，一定要有返啲煉奶先可以中和到陣味。由於黑咖啡太苦，勉強飲兩啖之後放棄。今次既lunch幾好味，豬湯檬會想返嚟再試，注意餐廳有加一收費，同埋lunch hour都幾多人，可以晏少少避咗peak hour嚟試會好啲。