喜記蟹將軍 (iSQUARE國際廣場) (Moved) New Location

朋友介紹話喜記蟹將軍喺OpenRice有個二人餐好抵食，65折食炒辣蟹套餐，最鍾意食蟹嘅老公梗係唔執輸，即買即book去試吓。打響頭炮嘅當然係佢嘅招牌菜避風塘炒蟹，雖然有好多避風塘配料，但其實食落又唔算好辣，隻蟹超好肉，尤其是個蟹鉗，真係啖啖肉，食到我同老公都舔舔脷。一輪刺激之後，就食吓其他小菜，估唔到佢嘅豉椒炒蜆份量都唔少，個汁仲好好味，所以我哋忍唔住叫咗白飯。酸菜魚都唔錯，酸中帶點微辣，魚肉嫩滑仲要啖啖肉，越食越開胃。食小菜我最鍾意叫咕嚕肉，配埋菠蘿同三色椒非常惹味。呢個餐可以選擇招牌蟹油炒麵或者蒜蓉炒時菜，因為我哋叫咗白飯，同埋想食啲菜，所以我哋就選擇咗蒜蓉炒時菜，蒜蓉好香又唔會過鹹，味道不錯。最後埋單補返少少差價，都幾抵食！